ЛОНДОН, 4 май. /“Дунё” АА/. Ўзбекистон элчиси Равшан Усманов Британиянинг “Universities UK International” (“UUKi”) ташкилоти директори Жейми Арроусмит билан учрашди, деб хабар бермоқда “Дунё” АА мухбири.

 “Universities UK International” (“UUKi”) – Буюк Британия университетларининг халқаро фаолиятини мувофиқлаштирувчи ташкилот ҳисобланади. Ушбу ташкилот 140 дан ортиқ университет манфаатларини ҳимоя қилади ва глобал академик ҳамкорликни ривожлантиришга кўмаклашади.

Мулоқот чоғида Жейми Арроусмит “UUKi”нинг бугунги кундаги фаолияти ҳақида маълумот берди. У Буюк Британия олий таълимининг халқаро рақобатбардошлигини ошириш ва хорижий талабалар сонини кўпайтириш масалалари ҳақида сўз юритди.

Британия томони Ўзбекистон билан қатор йўналишларда ҳамкорликни ривожлантиришга тайёрлигини таъкидлади. Жумладан, мамлакатда Британия университетлари филиалларини очиш, қўшма таълим дастурларини амалга ошириш, инглиз тилидаги ўқитишни кенгайтириш ҳамда профессор-ўқитувчилар малакасини ошириш бўйича фикр билдирди.

Учрашув якунида томонлар ҳамкорликни янада мустаҳкамлаш, амалиётга йўналтирилган қўшма лойиҳаларни амалга ошириш ва мунтазам мулоқотни давом эттиришга келишиб олди.