ТЕЛЬ-АВИВ, 23 январь. /«Дунё» АА/. Ўзбекистон элчиси Жаҳонгир Аминов Исроилнинг «Sapir Medical Clinic» компанияси бош директори ва ушбу мамлакатнинг тиббий туризм ассоциацияси раиси Марк Каценельсон билан учрашди, деб хабар бермоқда «Дунё» АА мухбири.

Тадбирда асосий урғу Ўзбекистонда тиббий туризмни ривожлантириш, қўшма таълим ва амалий дастурларни амалга ошириш ҳамда юртимизда Исроил клиникасини очишга қаратилди.

Марк Каценельсоннинг таъкидлашича, Ўзбекистонда Исроилнинг илғор тиббий технологияларидан муваффақиятли фойдаланиш мумкин, бу эса, албатта, тиббий таълим, тиббий хизматлар кўрсатиш ва туризмни ривожлантиришга хизмат қилади.

Учрашув якунида Ўзбекистон Соғлиқни сақлаш вазирлиги ва бошқа манфаатдор муассасалар билан биргаликда тиббий туризм доирасида Ўзбекистонга хорижлик беморларни жалб этиш, ўқув-амалий дастурлар ҳамда республикамизда Исроил клиникасини барпо этиш бўйича лойиҳаларни ишлаб чиқишга келишиб олинди.