ТОШКЕНТ, 25 апрель. /"Дунё" АА/. Ўзбекистон ташқи ишлар вазири Бахтиёр Саидов бугун Саудия Арабистони ташқи ишлар вазири Файсал бин Фархон Ол Сауд билан телефон орқали мулоқот қилди, деб хабар бермоқда "Дунё" АА мухбири.

"Саудия Арабистони Подшоҳлиги ташқи ишлар вазири Файсал бин Фархон Ол Сауд Ҳазрати Олийлари билан телефон орқали самимий мулоқот қилдик, – деб ёзди Ўзбекистон ТИВ раҳбари ўзининг telegram-каналида. – Ўзбекистон ва Саудия Арабистони ўртасидаги тобора мустаҳкамланиб бораётган шерикликни янада ривожлантириш масалалари юзасидан фикр алмашдик. Мулоқотимизда Марказий Осиё ва Кўрфаз минтақалари ўртасидаги ҳамкорликни чуқурлаштиришга алоҳида эътибор қаратилди. Савдо, инвестициялар ва ўзаро боғлиқликни кенгайтириш, шунингдек, минтақаларимизда тинчлик ва тараққиётни қўллаб-қувватлаш борасидаги умумий интилишларимизни яна бир бор таъкидладик".