ТОШКЕНТ, 9 июль. /“Дунё” АА/. Ўзбекистон ташқи ишлар вазири Бахтиёр Саидов Минск шаҳрида “Беларусь–Ўзбекистон дўстлик хиёбони”нинг очилиш маросимида иштирок этди, деб хабар қилмоқда “Дунё” АА мухбири.

“Ўзбекистон Республикаси Президенти Шавкат Мирзиёев Жаноби Олийларининг Беларусь Республикасига расмий ташрифи доирасида Минск шаҳридаги Тошкент кўчасида жойлашган “Беларусь– Ўзбекистон дўстлик хиёбони”нинг очилиш маросимида иштирок этдик, – деб ёзди Ўзбекистон ТИВ раҳбари ўзининг telegram-каналида. – Ҳамкасбим, Беларусь Республикаси ташқи ишлар вазири Максим Риженков билан биргаликда мамлакатларимиз ўртасидаги абадий дўстлик, ўзаро ҳурмат, ишонч ва стратегик шериклик муносабатларининг рамзи сифатида дарахт кўчатларини экдик.

Ушбу Дўстлик хиёбони Ўзбекистон ва Беларусь халқларини боғлаб турган мустаҳкам ришталар, самимий муносабатлар ҳамда кўп қиррали ҳамкорликнинг ёрқин тимсоли бўлиб хизмат қилишига ишонамиз”.

“Дунё” АА олган сурат