LAHOR, 14-mart. /“Dunyo” AA/. Toshkent viloyati hokimi Zoyir Mirzayev va O‘zbekiston elchisi Alisher To‘xtayev boshchiligidagi delegatsiya Lahor shahrida Pokistonning “Royal Leather Industries” kompaniyasida bo‘lib, korxona rahbari Malik Muhammad Azam bilan uchrashuv o‘tkazdi, deb xabar bermoqda “Dunyo” AA muxbiri.

Uchrashuvda O‘zbekistonda mahalliy xomashyoni chuqur qayta ishlash, yuqori qo‘shilgan qiymatga ega mahsulotlar ishlab chiqarish va eksport yo‘nalishlarini kengaytirish, shuningdek texnikalar transferini yo‘lga qo‘yish masalalari muhokama qilindi.

Zoyir Mirzayev Pokiston delegatsiyasiga charm sanoati va charmni qayta ishlash sohasida erishilgan natijalar, xorijiy investitsiyalarni jalb qilish va qo‘shma korxonalarni tashkil etish orqali raqobatbardosh mahsulotlar ishlab chiqarish ishlari haqida ma’lumot berdi. Shuningdek, O‘zbekistonda 100 dan ortiq charm qayta ishlash korxonalari faoliyat yuritishi va ularning mahsulotlari Markaziy Osiyo va Rossiyaga eksport qilinishi ta’kidlandi.

Diplomatlar Toshkent viloyatida 35 gektar maydonda maxsus charmni qayta ishlash sanoat zonasi tashkil etilganini ma’lum qildi. Bu yerda yuqori texnologik korxonalarni joylashtirish mumkinligi va “Royal Leather Industries” kompaniyasi ham o‘z loyihalarini amalga oshirishi mumkinligi aytildi.

Kompaniya rahbari Malik Muhammad Azam hamkorlikning aniq yo‘nalishlari belgilanganini va joriy mart–aprel oylarida qo‘shma loyihalarni amalga oshirish maqsadida O‘zbekistonga delegatsiya tashrifini rejalashtirayotganini bildirdi.

“O‘zbekistonda qayta ishlanmayotgan teri miqdori katta. Ushbu xomashyoni yig‘ib, Toshkent viloyatida qayta ishlash korxonasi tashkil etish ishlari boshlangan. Qayta ishlangan mahsulotlarni Pokistonga eksport qilib, u yerda tayyor mahsulotlarga aylantirib, keyinchalik boshqa mamlakatlarga yuborish rejalashtirilmoqda”, - dedi u.

Muzokaralar yakunida qayd etilganidek, “Royal Leather Industries” bilan hamkorlik O‘zbekiston charm sanoatining salohiyatini oshirish, yangi ish o‘rinlari yaratish va tayyor mahsulotlar eksporti hajmini kengaytirishga xizmat qilishi kutilmoqda.