OSTONA, 23 may. /“Dunyo” AA/. Qozog‘istonning “Exclusive” nashrida O‘zbekiston Milliy investitsiya jamg‘armasi (“UzNIF”) aksiyalarining London va Toshkent fond birjalarida joylashtirilgani xususida maqola e’lon qilindi, deb xabar bermoqda “Dunyo” AA muxbiri.

Maqolada yozilishicha, aksiyalarni joylashtirish mamlakat tarixidagi kapital bozoridagi eng yirik bitim bo‘ldi. IPO doirasida fond global depozit kvitansiyalari (“GDR”) va aksiyalarni joylashtirdi va investorlarga kapitalning taxminan 31 foizini taklif qildi.

Joylashtirish narxi “GDR” uchun 25 dollarni va aksiya uchun esa 4,65 so‘mni tashkil etdi. Jalb qilingan mablag‘larning umumiy hajmi qariyb 603,6 million dollarga yetdi.

Ma’lumotlarga ko‘ra, joylashtiruvga bo‘lgan talab taklifdan ancha yuqori bo‘lib, 2,8 milliard dollardan oshgan, arizalar kitobi esa to‘rt martadan ko‘proq qayta imzolangan.

Nashrda qayd etilishicha, kelishuv ishtirokchilari orasidan “BlackRock”, “Franklin Resources” va “Redwheel” kabi yirik xalqaro investorlar o‘rin olgan.

Aksiyalarni joylashtirish “Franklin Templeton” kompaniyasi bilan hamkorlikda o‘tkazilib, bu O‘zbekiston uchun bir vaqtning o‘zida ikkita fond birjasida amalga oshirilgan ilk xalqaro ommaviy joylashtiruv bo‘ldi.