LONDON, 3-may. /“Dunyo” AA/. Buyuk Britaniya fuqarolari – marhum Jon va Fillis Emili Le Bretonlar Ikkinchi jahon urushida ko‘rsatgan jasorati va insonparvarlik harakatlari uchun “Do‘stlik” ordeni bilan taqdirladi, deb xabar bermoqda “Dunyo” AA muxbiri Britaniyaning “London Post” portaliga tayanib.

Prezident farmoniga ko‘ra, er-xotin Ikkinchi jahon urushi davrida, g‘oyat tahlikali vaziyatda, o‘z hayotlarini jiddiy xavf-xatarga qo‘yib bo‘lsa-da, Jersi orolidagi fashistlar konslageridan qochib chiqishga muvaffaq bo‘lgan o‘zbekistonlik askar Boqijon Akramovga o‘z uylaridan joy berib, uning jonini asrab qolganlari uchun taqdirlangan. O‘z hayoti uchun jiddiy xavfga qaramay, Le Bretonlar askarni o‘z uylarida yashirib, asirlikdan himoya qilgan.

Farmonda er-xotinning “buyuk jasorati va insonparvarlik fazilatlari” yuqori baholanib, ularning ishi dunyo xalqlari o‘rtasida tinchlik, do‘stlik va birodarlik g‘oyalarini targ‘ib etishda namuna ekani taʼkidlangan. Ularning xalqaro hamjihatlik va birdamlikni mustahkamlashga qo‘shayotgan beg‘araz hissasi eʼtirof etilmoqda.

“Do‘stlik” ordeni O‘zbekistonning oliy davlat mukofotlaridan biri bo‘lib, odatda ikki tomonlama munosabatlarni rivojlantirish, tinchlikni mustahkamlash va gumanitar qadriyatlarni targ‘ib qilishga qo‘shgan hissasi uchun xorijiy fuqarolarga beriladi.

Bayon etilgan voqealardan sakson yildan ko‘proq vaqt o‘tgach, o‘limidan keyingi mukofot o‘zbek xalqining Le Breton oilasining jasorati va maʼnaviy matonatiga bo‘lgan hurmatining belgisi bo‘ldi. U tarixning eng og‘ir davrlaridan birida O‘zbekiston va Buyuk Britaniya fuqarolarini birlashtirgan hamdardlik harakatini abadiylashtiradi.

Rasmiy taqdirlash marosimi belgilangan tartibda o‘tkazilishi va Le Breton oilasi vakillari ushbu mukofotni olishi rejalashtirilgan.

Avvalroq Britaniya ommaviy axborot vositalarida Boqijon Akramov ukrainalik ekani maʼlum qilingandi, biroq keyingi surishtiruvlar uning O‘zbekiston fuqarosi ekanini tasdiqladi.