LONDON, 4-fevral. /“Dunyo” AA/. O‘zbekiston Prezidentining tashqi siyosat bo‘yicha maslahatchisi o‘rinbosari – Markaziy Osiyo xalqaro instituti direktori Javlon Vahobov boshchiligidagi delegatsiya amaliy tashrif bilan Londonda bo‘ldi, deb xabar bermoqda “Dunyo” AA muxbiri.

Tashrif doirasida Buyuk Britaniyaning Markaziy Osiyo bo‘yicha partiyalararo parlament guruhi aʼzolari, Tashqi ishlar vazirligi hamda yetakchi tahlil markazlari vakillari bilan muzokara o‘tkazildi.

Tomonlar O‘zbekiston – Buyuk Britaniya hamkorligining bugungi holati va istiqbollari yuzasidan fikr almashdi. Markaziy Osiyo davlatlari rahbarlarining Maslahat uchrashuvi formatining mazmun-mohiyatini muhokama qildi.

Uchrashuvda mintaqadagi vaziyatga, amalga oshirilayotgan yirik infratuzilma va transport-logistika loyihalariga alohida eʼtibor qaratildi. O‘zbekistonning ochiq, pragmatik va ko‘p qirrali tashqi siyosati natijasida Markaziy Osiyo yaxshi qo‘shnichilik, barqaror rivojlanish va mintaqa davlatlari manfaatlarini o‘zaro hurmat qilish tamoyillariga asoslangan hamkorlik makoniga aylangani taʼkidlandi.

Tashrif yakunida Markaziy Osiyo xalqaro instituti va Xalqaro rivojlanish instituti o‘rtasida hamkorlik to‘g‘risida anglashuv memorandumi imzolandi.