LONDON, 26-yanvar. /“Dunyo” AA/. O‘zbekiston elchixonasi Kardiff universitetining xalqaro hamkorlik masalalari bo‘yicha masʼul xodimi Bekki Daniya bilan onlayn uchrashuv o‘tkazdi, deb xabar bermoqda “Dunyo” AA muxbiri.

Kardiff universiteti 1883-yilda tashkil etilgan. Ayni paytda bu yerda 33 mingga yaqin talaba tahsil olmoqda. Muassasada 4 mingga yaqin professor-o‘qituvchi mehnat qilmoqda. Universitetda amaliy fanlar, biznes-menejment, muhandislik, sanʼat va ijtimoiy fanlar, farmatsevtika, hamshiralik ishi va sog‘liqni saqlash sohalari o‘qitiladi.

Suhbat chog‘ida universitet bilan respublikamiz oliy taʼlim muassasalari hamda “El-yurt umidi” jamg‘armasi o‘rtasida hamkorlikni yo‘lga qo‘yish masalalari muhokama qilindi.

Britaniya tomoni Kardiff universiteti kelgusida respublika oliy taʼlim muassasalari bilan uzoq muddatli hamkorlikni yo‘lga qo‘yishga tayyorligini bildirdi. Uchrashuv yakunida hamkorlikni yana-da faollashtirishga kelishib olindi.