Mintaqada vaziyatning keskinlashuvi fonida O‘zbekistonning Isroildagi elchixonasi o‘z fuqarolari uchun shoshilinch tavsiya bilan chiqdi.

Vatandoshlarga hushyorlikni saqlash, Isroil hukumati tomonidan belgilangan xavfsizlik choralariga qat’iy rioya qilish va imkon qadar keyingi ko‘rsatmalar olingunga qadar maxsus jihozlangan xavfsiz hududlarda bo‘lish qat’iy tavsiya etiladi.

Elchixona rasmiy ko‘rsatmalarga diqqat bilan amal qilish, zaruratsiz ko‘chaga chiqishni cheklash va xotirjamlikni saqlash muhimligini ta’kidladi.

Shuningdek, fuqarolarga vaziyat barqarorlashgunga qadar Isroil hududini vaqtincha tark etish tavsiya qilingan. Isroil-Misr chegarasidagi tun-u kun ishlaydigan «Begin» chegara o‘tish punktiga alohida e’tibor qaratilgan; shu bilan birga, O‘zbekiston fuqarolarining Sinay yarimoroliga kirishi uchun viza talab qilinmaydi.

Chegaradan o‘tishni tezlashtirish maqsadida chegara bojlarini oldindan onlayn tarzda to‘lash tavsiya etiladi. Boshqa quruqlikdagi o‘tish punktlaridan foydalanish tavsiya etilmaydi, ularning ish vaqti o‘zgarishi mumkinligi sababli, sayohatni rejalashtirishdan oldin dolzarb ma’lumotlarni aniqlashtirish zarur.

Elchixona, shuningdek, fuqarolarni O‘zbekiston Tashqi ishlar vazirligi va xorijdagi diplomatik vakolatxonalarning rasmiy manbalaridagi yangiliklarni muntazam kuzatib borishga hamda Isroil xizmatlarining ogohlantirishlari va tavsiyalarini inobatga olishga chaqiradi.

Favqulodda vaziyatlarda vatandoshlar quyidagi telefon raqamlari: 03-672-2466, 03-672-2371, 03-758-5075, 03-758-5076, +972 54 485 1397 yoki il.uzembassy@mfa.uz elektron pochtasi orqali murojaat qilishlari mumkin.