QOHIRA, 1-mart. /“Dunyo” AA/. O‘zbekiston elchisi Mansurbek Qilichev va Misr tashqi ishlar vaziri o‘rinbosari Samar al-Ahdal o‘rtasida uchrashuv bo‘lib o‘tdi, deb xabar qilmoqda “Dunyo” AA muxbiri.

Muloqot chog‘ida oliy va yuqori darajadagi tashriflar va qo‘shma tadbirlar haqida fikr almashildi, so‘nggi paytda iqtisodiy diplomatiya yo‘nalishida hamkorlik rivojlanayotgani taʼkidlandi.

Xususan, O‘zbekiston va Misr o‘rtasida savdo-iqtisodiy va investitsiyaviy aloqalar kengaygani, “Orascom Investment”, “Orascom Construction”, “In2Metals”, “Nile Sugar”, “Polyserve”, “ACDIMA”, “Minapharm”, “Endeavour” singari kompaniyalarning yurtimizda faoliyatini yo‘lga qo‘ygani qayd etildi.

Hamkorlikni yana-da faol rivojlantirish maqsadida O‘zbekiston va Misr ishbilarmon doiralari delegatsiyalarining o‘zaro tashrifini tashkil etish, ularning xalqaro ko‘rgazmalar, biznes-forumlar va kooperatsiya maydonlarida keng ishtirok etishiga birgalikda ko‘maklashish masalalari muhokama qilindi.

Uchrashuv yakunida tomonlar O‘zbekiston va Misr o‘rtasidagi Hukumatlararo qo‘shma komissiyaning navbatdagi, sakkizinchi yig‘ilishini shu yil Qohira shahrida o‘tkazish bo‘yicha kelishib oldi.