BUXAREST, 25-may. /“Dunyo” AA/. “Euronews Romania” nashrida 16–19-iyun kunlari bo‘lib o‘tadigan Toshkent xalqaro investitsiya forumiga bag‘ishlangan maqola eʼlon qilindi, deb xabar bermoqda “Dunyo” AA muxbiri.

Maqolada qayd etilishicha, Toshkent xalqaro investitsiya forumi so‘nggi yillarda investitsiyaviy hamkorlik va ishbilarmonlik aloqalarini rivojlantirish istiqbollarini muhokama qilish uchun Markaziy Osiyodagi eng yirik platformalardan biriga aylangan.

Nashr taʼkidlashicha, bo‘lajak forum kun tartibidan barqaror iqtisodiy o‘sish, moliya bozorlarini rivojlantirish, transport-logistika aloqalarini kengaytirish, shuningdek, “yashil” energetika sohasidagi loyihalarni amalga oshirish masalalari o‘rin olgan.

Toshkent xalqaro moliya markazini rivojlantirish, investitsiyalarni himoya qilishning zamonaviy mexanizmlarini joriy etish va xalqaro iqtisodiy hamkorlikni kengaytirishga alohida eʼtibor qaratilishi rejalashtirilgan.

Shuningdek, energetika, infratuzilma va davlat-xususiy sheriklik sohalarida yirik loyihalarni amalga oshirish istiqbollari hamda O‘zbekistonning mintaqadagi asosiy investitsiyaviy va ishbilarmonlik markazlaridan biri sifatidagi rolini mustahkamlash masalalari muhokama qilinishi kutilmoqda.