TOSHKENT, 11-fevral. /“Dunyo” AA/. O‘zbekiston tashqi ishlar vaziri Baxtiyor Saidov Markaziy Osiyoning boshqa mamlakatlari TIV rahbarlari bilan birgalikda Germaniya Federal Prezidenti Frank-Valter Shtaynmayer tomonidan qabul qilindi, deb xabar bermoqda “Dunyo” AA muxbiri.

“Hamkasblarimiz bilan birga Germaniya Federativ Respublikasi Prezidenti Frank-Valter Shtaynmayer Janobi Oliylari bilan samarali uchrashuv o‘tkazdik. Aloqalarimizni mustahkamlash va mintaqaviy hamkorlikni rivojlantirish masalalarini muhokama qildik, – deb yozdi O‘zbekiston TIV rahbari o‘zining telegram-kanalida. – O‘zbekiston Prezidenti Shavkat Mirziyoyev Janobi Oliylarining samimiy salomlarini yetkazib, Germaniyaning Markaziy Osiyoga bo‘lgan doimiy qo‘llab-quvvatlashi uchun minnatdorlik bildirdik.

Germaniyaning mintaqamizga nisbatan Yevropa Ittifoqi siyosatini shakllantirishdagi roli muhim ahamiyatga ega bo‘lib, ayniqsa Markaziy Osiyo bo‘yicha YI Strategiyasi kabi tashabbuslar orqali bu yaqqol ko‘rinadi. Ikki tomonlama munosabatlarimiz izchil rivojlanib bormoqda va yashil taraqqiyot, energetika hamda taʼlim kabi sohalarda aniq hamkorlik rejalari mavjud.

Iliq mehmondo‘stlik uchun minnatdorlik bildiramiz. O‘zbekiston–Germaniya munosabatlari barcha yo‘nalishlarda kuchli ijobiy surʼat bilan rivojlanishda davom etishiga ishonamiz”.