TOSHKЕNT, 11-noyabr. /“Dunyo” AA/. Jahon iqtisodiyoti va diplomatiya universiteti (JIDU) Ilmiy ishlar va innovatsiyalar bo‘yicha prorektori, professor Timur Dadabayev AQShda joylashgan Markaziy Yevroosiyo tadqiqotlari jamiyati (Central Eurasian Studies Society – CESS) tomonidan o‘tkazilgan saylovda g‘alaba qozonib, tashkilotning 2027–2028-yillar uchun prezidenti (President-Elect) etib saylandi, deb xabar bermoqda “Dunyo” AA muxbiri.

CESS Markaziy Yevroosiyo mintaqasini o‘rganish bo‘yicha faoliyat yurituvchi yetakchi olimlar, tadqiqotchilar va mutaxassislarni birlashtirgan dunyodagi yirik xalqaro akademik jamiyatlardan biri hisoblanadi. Hozirda tashkilotga Kolumbiya universiteti professori Aleksandr Kuli (Alexander Cooley) rahbarlik qilmoqda.

Mazkur nufuzli xalqaro akademik lavozimga tarixda ilk bor O‘zbekiston vakilining saylanishi mamlakatimiz ilm-fani va ilmiy salohiyatining xalqaro miqyosda e’tirof etilayotganidan dalolat beradi.

Ushbu yutuq JIDUning xalqaro akademik hamjamiyatdagi nufuzini yanada mustahkamlash, yetakchi xorijiy ilmiy va tadqiqot markazlari bilan hamkorlikni kengaytirish hamda O‘zbekiston ilm-fanining jahon akademik makoniga integratsiyalashuviga xizmat qiladi.