BERLIN, 20-yanvar. /“Dunyo” AA./ Futbolga ixtisoslashgan nemis onlayn nashri internet sahifasida joriy yilning 1-iyun kuni futbol bo‘yicha O‘zbekiston milliy terma jamoasi safarda Kanada terma jamoasiga qarshi nazorat uchrashuvida maydonga tushishi haqida maqola eʼlon qilindi, deb xabar bermoqda “Dunyo” AA muxbiri.

Ushbu bahs bo‘lajak Jahon chempionatiga tayyorgarlik ko‘rayotgan har ikki jamoa uchun hal qiluvchi sinov bosqichi bo‘lishi kutilmoqda.

Kanada futbol jamoatchiligi ushbu o‘yinni Jahon chempionati oldidan “so‘nggi va eng muhim bosqich” deb baholamoqda. Mahalliy OAV va ekspertlarning fikricha, Osiyoning eng kuchli jamoalaridan biri bo‘lgan O‘zbekiston bilan bahs Kanada terma jamoasiga o‘z taktik sxemalarini sinovdan o‘tkazish va o‘yinchilarning jismoniy holatini tekshirib olish uchun ideal imkoniyatdir.

Kanada terma jamoasi bosh murabbiyi taʼkidlaganidek, O‘zbekistonning tartibli o‘yin uslubi va tezkor qarshi hujumlari har qanday raqib mudofaasi uchun jiddiy xavf tug‘dira oladi. Shu sababli, ushbu o‘yin kanadalik futbolchilar uchun o‘z mahoratlarini namoyish etish va yakuniy tarkibdan joy olish uchun so‘nggi imkoniyat bo‘lishi mumkin.

Nega aynan O‘zbekiston? Kanada futbol federatsiyasi raqib tanlashda strategik yondashuvdan foydalangan. Turli qitʼa va turli uslubdagi jamoalar bilan o‘yinlar tashkil etish orqali ular Jahon chempionatidagi har qanday syurprizlarga tayyor turishni maqsad qilgan.

O‘zbekiston terma jamoasining maydondagi qatʼiy intizomi Kanada mudofaa chizig‘idagi bo‘shliqlarni aniqlab berishi kutilmoqda. So‘nggi yillarda O‘zbekiston futbolining xalqaro maydondagi yutuqlari va o‘yinchilarning Yevropa hamda Osiyo yetakchi klublaridagi faoliyati jamoamizning jozibadorligini oshirdi.

Uchrashuv Kanadada katta qiziqish uyg‘otmoqda. Keyingi yillarda ushbu mamlakatda futbolga bo‘lgan eʼtibor keskin ortgan va 1-iyun kungi bahsda stadion muxlislar bilan to‘lishi taxmin qilinmoqda. Mahalliy ishqibozlar uchun bu o‘z qahramonlarini global turnir oldidan kuzatish uchun noyob imkoniyatdir.

Xulosa o‘rnida aytish mumkinki, ushbu o‘rtoqlik uchrashuvi nafaqat sport tadbiri, balki ikki mamlakat o‘rtasidagi sport aloqalarini mustahkamlash va O‘zbekiston brendini dunyo miqyosida targ‘ib qilish uchun xizmat qiladi. O‘zbekiston milliy terma jamoasi uchun esa bu dunyoning eng sara jamoalari bilan raqobatlasha olish salohiyatini yana bir bor namoyish etish imkoniyatidir.

Jamoamizning JCH-2026 arafasida Kanada kabi kuchli raqib bilan kuch sinashishi mamlakatimiz futbolining xalqaro nufuzi ortib borayotganidan dalolat beradi.