VASHINGTON, 13-avgust. /“Dunyo” AA/. “The Intercept” nashri va “Freedom of the Press Foundation” jamg‘armasi AQSH Prezidenti Donald Trampga qarshi federal daʼvo arizasi kiritib, uning “Truth Social” ijtimoiy tarmog‘idagi nashrlariga pulli kirish imkoniyatini bekor qilishni talab qilmoqda, deb xabar beradi “Dunyo” AA muxbiri.

“Reuters” agentligining xabar berishicha, daʼvo “Trump Media & Technology Group” kompaniyasi tomonidan 1-avgust kuni ishga tushirilgan “Truth API” xizmatiga taalluqli. Ushbu xizmat obunachilarga oyiga 60–100 ming dollar evaziga “Truth Social”dagi 10 ta mashhur akkaunt, jumladan, prezident akkaunti postlari bilan muddatidan avval tanishish imkonini beradi.

Daʼvogarlarning taʼkidlashicha, xizmat pulli foydalanuvchilarga moliya bozorlariga taʼsir ko‘rsatishi mumkin bo‘lgan maʼlumotlarni boshqalardan oldin olishga sharoit yaratadi. Donald Tramp “Truth Social”dan aksiyalar, neft va boshqa aktivlar narxiga taʼsir qilishi mumkin bo‘lgan tariflar, tashqi siyosat va Yaqin Sharqdagi mojarolar haqida xabar berish uchun muntazam foydalanadi.

Daʼvo arizasida aytilishicha, prezident o‘zining davlat faoliyati bilan bog‘liq axborotga kirish huquqini sotishdan moliyaviy manfaat ko‘rmoqda. Daʼvogarlar buni AQSH Konstitutsiyasining Birinchi tuzatishiga zid deb hisoblab, pulli xizmat amalda ekan, Oq uyning rasmiy xabarlarni faqat “Truth Social” orqali eʼlon qilishini taqiqlashni talab qilmoqda.

Taʼkidlanishicha, 10 dan ortiq mijoz allaqachon “Truth API”ga obuna bo‘lgan. Xizmat Donald Trampning akkauntidan tashqari, vitse-prezident Jey Di Vens, Sog‘liqni saqlash va ijtimoiy xizmatlar vaziri kichik Robert Kennedi, FQB direktori Kesh Patel hamda Oq uyning nashrlari bilan tanishish imkonini ham taklif etadi.

Donald Tramp “Trump Media & Technology Group”ning eng yirik aksiyadori bo‘lib, “Donald J. Trump Revocable Trust” orqali kompaniyaning 41,3 foiziga egalik qiladi. Uning to‘ng‘ich o‘g‘li kichik Donald Tramp “Trump Media” direktorlar kengashi aʼzosi bo‘lib, ushbu trastni boshqaradi.

“Trump Media”da Prezident Donald Trampning xabarlari allaqachon ko‘plab platformalar va ommaviy axborot vositalari, jumladan, pulli obuna xizmatlari orqali tarqatilayotganini maʼlum qildi. Oq uy hozircha daʼvo yuzasidan izoh bermadi.

“Reuters” agentligi surati