DUSHANBE, 14-aprel. /“Dunyo” AA/. Tojikiston Milliy fanlar akademiyasi Falsafa, siyosatshunoslik va huquq instituti ilmiy xodimi Viktor Kim “Dunyo” AA muxbiriga Qozog‘iston Prezidenti Qasim-Jomart Toqayevning amaliy tashrif bilan O‘zbekistonga amalga oshirgan tashrifi haqida o‘z fikr-mulohazalarini bildirdi:

– O‘zbekiston va Qozog‘iston yetakchilarining Buxorodagi uchrashuvi qardosh davlatlar o‘rtasidagi yaqinlashuv, yaxshi qo‘shnichilik va ittifoqchilik munosabatlarini rivojlantirishda muhim ahamiyat kasb etadi.

Shuni yodda tutish kerakki, bugungi kunda O‘zbekiston va Qozog‘iston Markaziy Osiyodagi iqtisodiy baquvvat davlatlar bo‘lib, ular mintaqaviy yalpi ichki mahsulotning qariyb 80 foizini va mintaqa aholisining 70 foizini tashkil etadi. Shu bilan birga, sanoatga yuqori texnologiyalarni joriy etish, AKT texnologiyalarni keng joriy etish va kelajakka bo‘lgan qarashlar – kosmik dasturlarda ishtirok etishda ham yetakchilik qilmoqda.

Bu ikki davlatda sanoat kooperatsiyasida hamkorlik qilish va mintaqani “Shimol–Janub” va “Sharq–G‘arb” yo‘laklari chorrahasidagi transport-logistika markaziga aylantirish uchun ham yaxshi istiqbollar mavjud. 2025-yil yakuniga ko‘ra, ikki davlat o‘rtasidagi tovar ayirboshlash hajmi 5 milliard dollarga yetgan bo‘lsa, Buxorodagi muzokaralar yakunida yaqin istiqbolda o‘zaro savdoni 10 milliard dollarga yetkazish vazifasi qo‘yildi.

Qozog‘iston Prezidenti Qasim-Jomart Toqayev Buxoroda viloyatni rivojlantirishni boshqarishdagi zamonaviy yondashuvlar – Buxoro viloyati hokimligining Situatsion markazi bilan tanishdi. Bu xuddi kosmik parvozlarni boshqarish markaziga o‘xshaydi, u yerda viloyat hayot faoliyatining asosiy yo‘nalishlari bo‘yicha maʼlumotlar real vaqt rejimida to‘planadi, qayta ishlanadi va tizimli tahlil qilinadi.

Davlat rahbarlari Buxoro shahridagi universal sport majmuasida o‘tkazilayotgan sunʼiy intellekt bo‘yicha “National AI Hackathon” umummilliy xakatoniga tashrif buyurdi. Ikki mamlakat yetakchilari Buxoro shahrida raqobatbardosh tayyor mahsulotlar ishlab chiqarishning to‘liq siklini yo‘lga qo‘ygan “Nigora” kompaniyasining sanoat maydonchasi bilan tanishdi. Yaponiya, Italiya, Belgiya va Germaniyadan keltirilgan yuqori texnologik liniyalar xorijiy bozorlarda ishonchli raqobatlashish va yiliga 20 million pogon metr tayyor mato va 1 million dona tikuvchilik mahsulotlari ishlab chiqarish imkonini beradi.

Mintaqadagi ikki tomonlama munosabatlarning yutuqlari mintaqaning rivojlanishi kontekstida ko‘rib chiqilmoqda. 2026-yil Markaziy Osiyoda tarkibiy o‘zgarishlarning yangi bosqichini boshlab beradi. O‘zbekiston tashabbusi bilan 2017-yilda boshlangan integratsiya jarayonlari Markaziy Osiyoni hamkorlik va ishonchning yagona mintaqaviy makoniga bosqichma-bosqich o‘zgartirib bormoqda.