TOKIO, 21-fevral. /“Dunyo” AA/. Yaponiyaning Markaziy Osiyo va Kavkazni o‘rganish tadqiqot instituti direktori Tetsudji Tanaka “Dunyo” AA uchun O‘zbekiston Prezidenti Shavkat Mirziyoyevning 17–19-fevral kunlari AQSHga amalga oshirgan tashrifi va Tinchlik kengashining birinchi yig‘ilishdagi ishtiroki haqida fikr bildirdi:

­– O‘zbekiston Prezidenti Shavkat Mirziyoyevning Vashingtonda bo‘lib o‘tgan Tinchlik kengashining birinchi sammitidagi ishtiroki protokol doirasidan ancha tashqariga chiqadigan voqeadir. Bu geosiyosiy landshaftdagi tub o‘zgarishlarning yorqin tasviri va yordam qabul qiluvchi mintaqadan murakkab xalqaro muammolarni hal qilishga amaliy hissa qo‘shishga tayyor masʼuliyatli global davlatga aylanayotgan O‘zbekiston tashqi siyosatining yangi sifatini namoyish etmoqda.

Shavkat Mirziyoyevning sammitdagi nutqi konstruktiv va masʼuliyatli sheriklik ruhida o‘tdi. Iqtisodiyoti gullab-yashnayotgan va munosib turmush sharoitlariga ega bo‘lgan Yangi Gazoni Yangi O‘zbekiston va Yangi Toshkent konsepsiyalariga o‘xshash tarzda barpo etish taklifi asosiy tezis bo‘ldi. Bu shunchaki ritorika emas, balki islohotlarning o‘z tajribasiga asoslangan muayyan o‘zgarishlar falsafasini taklif qilishdir.

O‘zbekiston yetakchisining G‘azo tashqi boshqaruvining har qanday mexanizmlari sektor aholisining qo‘llab-quvvatlashiga tayanishi kerakligiga urg‘u berishi prinsipial jihatdan muhimdir. Ushbu izoh Yaqin Sharq voqeligini nozik tushunish va qarorlarni chetdan majburlamaslikka intilishni ko‘rsatadi. Bu esa O‘zbekistonning pozitsiyasini to‘g‘ridan-to‘g‘ri yondashuvlardan ajratib turadi.

Umuman olganda, yakuniy deklaratsiyaning imzolanishi va G‘azo sektori infratuzilmasini tiklash loyihasida ishtirok etish O‘zbekistonning xalqaro mavqeini mustahkamlashga, uning global institutlar bilan hamkorligini kengaytirishga va Yaqin Sharqdagi mojarodan keyingi tartibga solish jarayonlarida ishtirok etuvchi davlat maqomini mustahkamlashga qaratilgan.