MINSK, 30-avgust. /“Dunyo” AA/. O‘zbekiston elchisi Nuriddin Mamajonov Belarus Milliy majlisi Respublika Kengashi raisi Natalya Kochanova bilan uchrashdi, deb xabar bermoqda “Dunyo” AA muxbiri.

Uchrashuv davomida ikki tomonlama hamkorlikning dolzarb yo‘nalishlari bo‘yicha bir qator muhim loyihalarni samarali amalga oshirish masalalari ko‘rib chiqildi.

Natalya Kochanova Belarus va O‘zbekiston o‘rtasidagi munosabatlarning strategik xususiyati va do‘stona muhitini ta’kidlab, parlamentlararo aloqalar ikki tomonlama va ko‘p tomonlama maydonlarda faol rivojlanayotganini mamnuniyat bilan qayd etdi.

Tomonlar savdo-iqtisodiy sohada, shuningdek, ta’lim, sog‘liqni saqlash, yoshlar siyosati va madaniy-gumanitar hamkorlik yo‘nalishlarida aloqalar jadal rivojlanayotganini ta’kidladilar.

“O‘zbekiston Prezidenti Shavkat Mirziyoyevning 8–9-iyul kunlari Belarusiga amalga oshirgan tarixiy tashrifi va uning yakunlari bo‘yicha qabul qilingan Strategik sheriklik to‘g‘risidagi Deklaratsiya ikki tomonlama munosabatlarda yangi muhit yaratdi hamda davlatlarimiz rahbarlari tomonidan qo‘yilgan vazifalarni amalga oshirishda yangicha yondashuvni talab etmoqda”, — deb ta’kidladi Respublika Kengashi raisi.

Shu munosabat bilan, 29–30-sentyabr kunlari Xiva shahrida o‘tkazilishi rejalashtirilgan O‘zbekiston-Belarus parlamentlararo forumiga faol va puxta tayyorgarlik ko‘rilayotgani bildirildi. Belarus delegatsiyasi tarkibiga hukumat vakillari va qator hududlar rahbarlari bilan bir qatorda yirik tadbirkorlar ham kirishi alohida qayd etildi.

Uchrashuvda erishilgan barcha kelishuvlarning samarali ijrosini ta’minlash tomonlarning yaqin istiqboldagi asosiy maqsadi sifatida belgilandi.