VLADIVOSTOK, 5-iyul. /“Dunyo” AA/. O‘zbekiston Bosh konsulxonasida Rossiyaning Primorsk o‘lkasi hukumati Migratsiya siyosati agentligi rahbari Mixail Sorokin bilan uchrashuv bo‘lib o‘tdi, deb xabar bermoqda “Dunyo” AA muxbiri.

Uchrashuvda Vladivostok shahrida amaliy tashrif bilan bo‘lib turgan O‘zbekiston Migratsiya agentligining Rossiyadagi vakolatxonasi rahbari Oybek Odilov ham ishtirok etdi.

Tomonlar Primorsk o‘lkasida O‘zbekiston fuqarolarini uyushgan holda ishga joylashtirishni kengaytirish, ularning huquq va manfaatlarini himoya qilish, shuningdek, migratsiya sohasidagi hamkorlikning dolzarb masalalarini muhokama qildi.

Mehnat migrantlarini mamlakatdan jo‘nab ketishdan oldin tayyorlash va o‘qitish, jumladan, turli mutaxassisliklar bo‘yicha kasbiy qayta tayyorlash masalalariga alohida e’tibor qaratildi.

Uchrashuv yakunida O‘zbekiston Oliy ta’lim, fan va innovatsiyalar vazirligi huzuridagi Kasb-hunar ta’limi agentligi va Primorsk o‘lkasi hukumati o‘rtasida hamkorlikni rivojlantirishga kelishib olindi.