AR-RIYOZ, 10-noyabr. /"Dunyo" AA/. Saudiya Arabistoni poytaxtida boʻlib oʻtgan "BMT Turizm" tuzilmasining Bosh assambleyasi 26-sessiyasida Butunjahon turizm tashkilotning bosh kotibi lavozimiga BAAlik Shayxa Nasser al Novais nomzodi tasdiqlandi, deb xabar bermoqda "Dunyo" AA muxbiri.

Nasser al Novais Butunjahon turizm tashkiloti – UNWTOning 50-yillik tarixida tashkilotni boshqaradigan birinchi ayol va BAAning birinchi vakili boʻldi. Uning toʻrt yillik mandati 2026-yil 1-yanvardan boshlanib, 2029-yil 31-dekabrgacha davom etadi. U bu lavozimda 2018-yildan buyon tashkilotga rahbarlik qilib kelgan Zurab Pololikashvilining oʻrnini egallaydi.

Yangi bosh kotib turizm va mehmonxona biznesida 15-yildan ortiq tajribaga ega. U "Rotana Hotels" xalqaro mehmonxonalar guruhi vitse-prezidenti, Abu-Dabi Savdo palatasining turizm boʻyicha ishchi guruhi rahbari, Abu-Dabi tadbirkor ayollar kengashi va Shveysariyaning "Les Roches Global Hospitality Education" mehmonxona akademiyasi kuzatuv kengashi a'zosi hisoblanadi.

"Bu gʻalaba – barchamizniki! Muvaffaqiyatlarimiz zamirida oʻzaro hurmat, insonparvarlik va turizm sohasiga mas'uliyat mujassam. Biz hamkorlikda turizmning eng yaxshi shakllarini ishlab chiqib, insoniyatni birlashtirishga harakat qilamiz", – deydi yangi bosh kotib.

Mutaxassislarning ta'kidlashicha, Shayxa Nasser al Novais nomzodining saylanishi mintaqalararo hamkorlikni mustahkamlashga zamin yaratib, Osiyo, Afrika va Markaziy Osiyoda barqaror turizmni rivojlantirish uchun yangi istiqbollar ochadi.