BAG‘DOD, 27-dekabr. /“Dunyo” AA/. O‘zbekiston Savdo-sanoat palatasi raisi Davron Vahobov boshchiligidagi biznes-delegatsiya Iroq ko‘rgazmalari va tijorat xizmatlari davlat kompaniyasi rahbari Mustafo al-Ani bilan uchrashuv o‘tkazdi, deb xabar qilmoqda “Dunyo” AA muxbiri.

Muzokaralar chog‘ida “Baghdad International Fair” ko‘rgazmasida O‘zbekiston pavilyonini tashkil etish masalalari batafsil muhokama etildi.

Shuningdek, delegatsiyamiz vakillari Bag‘dod xalqaro ko‘rgazmasi o‘tkaziladigan hududda O‘zbekiston pavilyoni uchun ajratilishi mumkin bo‘lgan 607 kvadrat metrlik alternativ 3 ta maydonni ko‘zdan kechirdi.

2026-yilning 1-7-fevral kunlari Bag‘dod shahrida bo‘lib o‘tadigan “Baghdad International Fair” xalqaro ko‘rgazmasida yurtimiz delegatsiyasi “Made in Uzbekistan” milliy brendi ostida ishtirok etishi rejalashtirilgan.