RIGA, 10-dekabr. /“Dunyo” AA/. Latviya va Estoniyada O‘zbekiston Konstitutsiyasi qabul qilingan kunga bag‘ishlangan keng ko‘lamli madaniy-maʼrifiy tadbirlar bo‘lib o‘tdi, deb xabar bermoqda “Dunyo” AA muxbiri.

Unda ushbu mamlakatlarda ishlayotgan va taʼlim olayotgan o‘zbekistonliklar, Latviya va Estoniya rasmiylari hamda mahalliy jamoatchilik vakillari ishtirok etdi.

Dastur doirasida ishtirokchilarga O‘zbekistonda amalga oshirilayotgan konstitutsiyaviy islohotlar, inson huquq va erkinliklarini taʼminlashga qaratilgan davlat siyosati haqida maʼlumot berildi.

Tadbirning madaniy qismida “Xalqlar do‘stligi” ansambli milliy raqs va qo‘shiqlardan iborat badiiy dasturni taqdim etib, o‘zbek madaniyati va sanʼatining o‘ziga xos jihatlarini namoyon qildi.

Ayniqsa, mazkur ansamblning Tallindagi chiqishlari tomoshabinlarda katta qiziqish uyg‘otdi. Ansambl sanʼatkorlari shaharning gavjum sayyohlik maskanlaridan biri – Rojdestvo maydonida konsert berib, turli mamlakatlardan kelgan mehmonlarga O‘zbekistonning boy madaniy merosini taqdim etdilar.

Boltiqbo‘yi mamlakatlarida bo‘lib o‘tgan tadbirlar O‘zbekiston Konstitutsiyasi kunini nishonlashga munosib hissa qo‘shibgina qolmay, O‘zbekistonning Latviya va Estoniya bilan madaniy-gumanitar aloqalarini yanada mustahkamlashga xizmat qildi. Bundan tashqari, ular xorijdagi vatandoshlar bilan hamkorlikni kengaytirish, o‘zbek madaniyati va sanʼatini xalqaro maydonda targ‘ib qilish uchun muhim platformaga aylandi.