INCHXON, 11-dekabr. /“Dunyo” AA/. O‘zbekiston elchixonasi tomonidan Konstitutsiyamiz qabul qilingan kun munosabati bilan Janubiy Koreyaning Inchxon shahrida vaqtincha istiqomat qilayotgan yurtdoshlar ishtirokida uchrashuv tashkil etildi, deb xabar bermoqda “Dunyo” AA muxbiri.

Tadbirda elchixona vakillari tomonidan yurtdoshlarimizga O‘zbekiston qonunchiligida, siyosiy, iqtisodiy va madaniy hayotida yuz berayotgan islohotlar va o‘zgarishlar, xususan, davlatimiz rahbarining xorijdagi vatandoshlarni qo‘llab-quvvatlash, millatlararo munosabatlarni mustahkamlashga qaratilgan so‘nggi farmon va qarorlarining mazmun-mohiyati to‘g‘risida so‘z yuritildi.

Shu bilan birga, Janubiy Koreya milliy qonunchiligi qoidalariga rioya qilish, buzg‘unchi g‘oyalar va provokatsiyalarga qarshi ogohlikka chaqirildi. Fuqarolarga huquqlari buzilgan yoki tazyiqqa uchragan taqdirda elchixona va mahalliy huquqni muhofaza qiluvchi organlarga qanday murojaat qilish bo‘yicha tushunchalar berildi.

Uchrashuv yakunida kelasi yilda elchixona va vatandoshlarimiz o‘rtasidagi aloqalarni yana-da faollashtirish maqsadida bu kabi tadbirlarni ko‘proq tashkil qilishga kelishib olindi.