Abu-Dabida Rossiya–Ukraina muzokaralarining birinchi kuni yakunlandi

Abu-Dabida 4-fevral kuni Rossiyaning Ukrainaga qarshi tajovuzkor urushiga barham berish masalasiga bagʻishlangan Rossiya, AQSH va Ukraina oʻrtasidagi uch tomonlama muzokaralarning birinchi kuni yakunlandi. Maslahatlashuvlar bugun davom ettiriladi.

Manba: Deutsche Well

“The Washington Post” xodimlarini 30 foizga qisqartirmoqchi

Amerikaning “The Washington Post” nashri 300 nafardan ortiq xodimini ishdan boʻshatadi. Shunda xodimlarining umumiy soni, taxminan, 30 foizga kamayadi.

Manba: The New York Times

Makkadagi muzeyda dunyodagi eng yirik Qurʼon namoyish qilindi

Saudiya Arabistonining Makka shahridagi muzeyda dunyodagi eng katta Qurʼon nusxasi namoyishga qoʻyildi. Muqaddas kitob Hira madaniy hududida joylashgan Muqaddas Qurʼon muzeyida namoyish etilmoqda. Qoʻlyozmaning balandligi 312 santimetr, eni 220 santimetr. Kitob 700 sahifadan iborat boʻlib, dunyodagi eng katta Qurʼon boʻlgani uchun Ginnesning rekordlar kitobiga kiritilgan.

Manba: Arab News

Trampni oʻldirmoqchi boʻlgan Rayan Raut umrbodga qamaldi

2024-yil golf klubida AQSH prezidenti Donald Trampga suiqasd qilishga harakat qilgan 59 yoshli Rayan Raut umrbod qamoq jazosiga hukm qilindi. Sudya Eylin Kennon hukm chiqarish toʻgʻrisidagi qarorida Rautning jinoyatlari “Shubhasiz, umrbod qamoq jazosiga loyiq” deb taʼkidlagan.

Manba: BBC

Saudiya Arabistonida dunyodagi eng baland bino quriladi

Saudiya Arabistonida balandligi ikki ming metrli “Rise Tower” majmuasi bunyod etilishi rejalashtirilmoqda. Minora hozirda rekordchi hisoblangan Dubaydagi Burj Xalifa osmonoʻpar binosidan ikki barobar baland boʻladi.

Manba: Time Out Dubai

Oq uy hududida mashhur dengizchi Xristofor Kolumb haykali oʻrnatilishi mumkin

AQSHda Prezident Donald Tramp tashabbusi bilan Oq uy hududida mashhur dengizchi Xristofor Kolumb haykali oʻrnatilishi mumkin. Oq uyga yaqin manbalarga koʻra, haykal binoning janubiy qismidan joy oladi. Biroq, bu hali rasman eʼlon qilinmagan.

Manba: Komonews

Nigeriyada qurolli hujum oqibatida 200 ga yaqin kishi halok boʻldi

Nigeriyaning Kvara shtatida qurolli shaxslar tomonidan uyushtirilgan hujum oqibatida koʻplab tinch aholi vakillari halok boʻldi. Rasmiy maʼlumotlarga koʻra, hujum Niger shtati bilan chegaradosh boʻlgan Vorodagi chekka qishloqda sodir boʻlgan. Qurolli shaxslar qishloqqa bostirib kirib, uylar va doʻkonlarni yoqib yuborgan.

Manba: Al Jazeera

AQSH va YEI Rossiyaga qarshi yangi sanksiyalar tayyorlamoqda

AQSH Rossiyaga qarshi yangi sanksiyalar paketini tayyorlab qoʻygan, biroq hozircha ularni joriy etmayapti. Shu bilan birga, Yevropa Ittifoqi ham Rossiyaning Ukrainadagi maxsus harbiy operatsiyasi boshlanishi sanasiga bogʻlab eʼlon qilinishi rejalashtirilgan yangi sanksiyalar paketini tayyorlagan.

Manba: Bloomberg