LONDON, 27-mart. /“Dunyo” AA/.  Toshkentdagi Xalqaro qishloq xo‘jaligi universiteti talabalari Buyuk Britaniyadagi Qirollik qishloq xo‘jaligi universitetida maxsus o‘quv dasturida ishtirok etdi, deb xabar bermoqda “Dunyo” AA muxbiri.

Talabalar bir hafta davomida ushbu universitetda bo‘lib, u yerdagi taʼlim sharoitlari va imkoniyatlar bilan tanishdi.

Dastur bakalavriat va magistratura talabalari uchun tashkil etilgan bo‘lib, juda qiziqarli va mazmunli o‘tdi. Undan fermer xo‘jaliklariga tashriflar, maʼruzalar, seminarlar, amaliy mashg‘ulotlar, sport tadbirlari va ekskursiyalar o‘rin oldi.

Ko‘p talabalar uchun bu Buyuk Britaniyaga birinchi safar bo‘ldi. Ayniqsa, ularning ko‘pchiligi bitiruvchi kurs bo‘lgani uchun, bu sayohat ular uchun muhim tajriba vazifasini o‘tadi.

Talabalar avvalroq, Qirollik qishloq xo‘jaligi universiteti vitse-kansleri Piter MakKefferi bilan ham uchrashgan edi. U O‘zbekistonga tashrif buyurganida ular bilan muloqot qilgan.

Rasmiy maʼlumotlarga ko‘ra, Qirollik qishloq xo‘jaligi universiteti Toshkentdagi Xalqaro qishloq xo‘jaligi universitetining asoschilaridan biri hisoblanadi. Universitet 2022-yilda tashkil etilgan bo‘lib, uning maqsadi O‘zbekistonda agrar taʼlimni rivojlantirish va qishloq xo‘jaligining ahamiyatini dunyoga tanitishdir.

2022-yildan buyon ikki universitet o‘rtasidagi hamkorlik talabalarga keng imkoniyatlar yaratmoqda. Jumladan, ular onlayn darslar va taʼlim materiallaridan foydalanish imkoniga ega.

Bunday xalqaro dasturlar talabalarning bilimlarini oshirish, xorijiy tajriba orttirish va kelajakda yaxshi mutaxassis bo‘lib yetishishida muhim ahamiyatga ega.