TOSHKENT, 19-yanvar. /“Dunyo” AA/. 2026-yil 25–26-mart kunlari O‘zbekiston poytaxtida “Xalqaro suv forumi – Tashkent Water Week” bo‘lib o‘tadi, deb xabar bermoqda “Dunyo” AA muxbiri.

Ushbu forum o‘zaro tajriba almashish, innovatsion yondashuvlarni muhokama qilish va suv resurslarini boshqarish bo‘yicha qo‘shma strategiyalarni ishlab chiqish uchun katta imkoniyat yaratadi.

Maʼlumki, Markaziy Osiyo iqlim o‘zgarishi, suv taʼminoti va irrigatsiyaga bo‘lgan ehtiyojning ortishi tufayli tobora suv resurslari tanqisligiga duch kelmoqda. Shu bilan birga, aholi ehtiyojlarini qondirish va iqtisodiyotning o‘sishi uchun suvga bo‘lgan talabning ortib borishi qishloq xo‘jaligi sohasiga qo‘shimcha bosim yuklayapti. Bu esa suv resurslaridan oqilona foydalanishni talab qiladi.

Bunday sharoitda suv resurslarini samarali va barqaror boshqarish mintaqaviy hamkorlikni mustahkamlashga va Markaziy Osiyoning global suv aylanishidagi jarayonga bevosita taʼsir ko‘rsatadigan strategik ustuvor yo‘nalishga aylanmoqda.

“Tashkent Water Week 2026” davlat organlari va xalqaro tashkilotlar vakillari, yetakchi olimlar, biznes va ekspertlar hamjamiyatini birlashtirib, suv xavfsizligi bo‘yicha transchegaraviy tahdidlarni muhokama qilish, innovatsion boshqaruv va texnologik yechimlarni namoyish etish imkonini bermoqda. Bunday saʼy-harakatlar suv resurslaridan oqilona foydalanish bo‘yicha amaliy strategiyalarni ishlab chiqish uchun platforma yaratadi.

Mazkur xalqaro forum mintaqaviy hamkorlikni mustahkamlash va suvdan foydalanishning barqaror modellarini ilgari surishga qaratilgan bo‘lib, Markaziy Osiyoning uzoq muddatli suv va iqtisodiy rivojlanishini taʼminlaydi.

So‘nggi yillarda mintaqa davlatlarida suv resurslaridan oqilona foydalanish va ularni muhofaza qilishga bag‘ishlangan xalqaro konferensiyalar, maslahat uchrashuvlari va ekspert muloqotlari o‘tkazildi. Shu nuqtai nazardan, “Tashkent Water Week 2026” mintaqaviy va global miqyosda suv resurslarini boshqarishga zamonaviy yondashuvlarni muhokama qilish va tajriba almashish uchun ko‘p tomonlama platformani shakllantirish orqali hamkorlikning mavjud formatlarini to‘ldirish va rivojlantirishga qaratilgan.