ISLOMOBOD, 16-fevral. /“Dunyo” AA/. Pokistonning ommabop “The Gulf Observer” elektron nashrida “O‘zbekistonda aprel oyi Amir Temur tavalludining 690 yilligi munosabati bilan “Amir Temur oyi” deb eʼlon qilindi” sarlavhali maqola eʼlon qilindi, deb xabar qilmoqda “Dunyo” AA muxbiri.

Nashrda maʼlum qilinganidek, O‘zbekiston Prezidentining Amir Temur tavalludining 690 yilligini keng nishonlash to‘g‘risidagi qarori qabul qilindi. Unda ushbu sana nafaqat tarixiy voqea, balki milliy o‘zlikni qayta tiklash va boy maʼnaviy va madaniy merosni o‘rganishning muhim jarayoni sifatida ham ahamiyati taʼkidlangan.

“Qarorga muvofiq, aprel oyi “Amir Temur oyi” deb eʼlon qilindi. Butun mamlakat bo‘ylab qator keng ko‘lamli taʼlim, ilmiy va madaniy tadbirlar, taʼlim muassasalari, ilmiy markazlar va mahalliy jamoalarda temuriyshunos olimlar, yozuvchilar va madaniyat arboblari ishtirokida uchrashuvlar o‘tkaziladi. Ushbu tashabbus doirasida Temuriylar davri tarixini tizimli o‘rganishni qo‘llab-quvvatlash va ushbu davrga oid tadqiqot natijalarini kengroq tarqatishni rag‘batlantirish maqsadida 2030-yilgacha bo‘lgan keng qamrovli yo‘l xaritasi tasdiqlandi”, – deyilgan manbada.

Dastur doirasidagi muhim tadbirlardan biri – bu 9–10-aprel kunlari Islom sivilizatsiyasi markazida bo‘lib o‘tadigan “Amir Temur va Temuriylar sivilizatsiyasining jahon tarixi va madaniyatidagi roli va ahamiyati” nomli xalqaro ilmiy konferensiyadir. Unda turli mamlakatlardan olimlar ishtirok etishi kutilmoqda. Bu yangi tadqiqotlar muhokamasini rag‘batlantiradi va xalqaro akademik hamkorlikni kengaytiradi.

Qarorda, “Temur tuzuklari” asarining ilmiy izohli matnini fors, arab, xitoy, ingliz, fransuz, ispan va rus tillarida chop etish ko‘zda tutilgan. Bundan tashqari, “Temuriylar davrining 100 nodir qo‘lyozmasi” va “Temuriylar davrining 100 nodir durdonasi” kitob-albomlari yaratiladi.

“Yana bir muhim tashabbus Temuriylar davri manbalari elektron platformasini ishlab chiqish bo‘ldi. Raqamlashtirilgan qo‘lyozmalar, tarixiy hujjatlar va akademik maqolalar keng auditoriya uchun ochiq bo‘ladi. Qarorda yubiley tadbirlariga tayyorgarlik ko‘rish va ularni o‘tkazish bo‘yicha tashkiliy qo‘mita tarkibi ham tasdiqlangan”, – deyilgan maqolada.