SANO, 26-oktabr. /"Dunyo" AA/. Yamanning "Hadramawt" elektron nashrida "Turizm Oʻzbekiston va Yevropa Ittifoqi oʻrtasidagi koʻprik sifatida" sarlavhali maqola e'lon qilindi, deb xabar qilmoqda "Dunyo" AA muxbiri.

"Soʻnggi yillarda turizm Oʻzbekistonning tashqi iqtisodiy strategiyasida ustuvor yoʻnalishga aylandi. Ushbu siyosat doirasida mamlakat Yevropa Ittifoqi bilan hamkorlikni faol rivojlantirib, turizm sohasini iqtisodiy oʻsish, madaniy almashinuv va xalqaro imijini mustahkamlashning kuchli vositasiga aylantirmoqda", – deb yozgan muallif.

Qayd etilishicha, Yevropa Ittifoqi bilan hamkorlik qoʻshma infratuzilma va raqamli loyihalardan tortib, turizmni global miqyosda targʻib qilishgacha boʻlgan keng koʻlamli tashabbuslarni qamrab oladi. 2025-yil aprel oyida Samarqandda birinchi "Markaziy Osiyo – YI" sammitining oʻtkazilishi muhim bosqich boʻldi. Sammitda turizmni rivojlantirishga alohida e'tibor qaratgan holda strategik sheriklik toʻgʻrisidagi deklaratsiya qabul qilindi.

"Oʻzbekiston Prezidenti Markaziy Osiyo sayyohlik yoʻnalishlarini YI standartlariga muvofiq birlashtirishga qaratilgan «Bir tur — butun mintaqa" tashabbusini taqdim etdi. Maqsad viza tartiblarini soddalashtirish, madaniy almashinuvlarni ragʻbatlantirish va mintaqa ichidagi sayohatlarni yevropalik sayyohlar uchun yanada qulay va jozibador qilishdir», – deyilgan nashrda.

Ta'kidlanishicha, madaniy hamkorlik ushbu sheriklikning asosiy elementiga aylandi. Oʻzbekiston va Yevropa mamlakatlari oʻrtasidagi madaniy muloqotni ramziy ma'noda ifodalovchi "Lazgi" baletining keng koʻlamli sahnalashtirilishi muhim voqea boʻldi. Oʻzbekiston shuningdek, ilmiy va ta'lim salohiyatini rivojlantirishga hissa qoʻshadigan, turizm xizmatlari sifatiga bevosita ta'sir koʻrsatadigan "Horizon Europe" kabi xalqaro dasturlarda ishtirok etadi.

Iqtisodiy ta'sir allaqachon sezilarli. 2025-yilga kelib 11 milliondan ortiq xorijiy sayyohlarni qabul qilish rejalashtirilgan, sanoat daromadi esa 4 milliard dollarni tashkil etishi kutilmoqda. Ushbu maqsadlarga erishish uchun Oʻzbekiston oʻz infratuzilmasini faol ravishda modernizatsiya qilmoqda va turizm sohasida raqamli yechimlarni joriy etmoqda. Bunga misol qilib Markaziy Osiyo va Yevropa universitetlari oʻrtasida yuqori tezlikdagi aloqalarni ta'minlagan, turizm sohasida tajriba va innovatsiyalar almashinuvini osonlashtirgan CAREN dasturini keltirish mumkin.

"Hadramawt"da e'lon qilingan maqola oxirida "Oʻzbekiston va YI oʻrtasidagi turizm sohasidagi hamkorlik shunchaki tajriba almashishdan koʻproq narsani anglatadi. Bu aniq iqtisodiy, madaniy va ijtimoiy foyda keltiradigan strategik ittifoqdir. Ushbu hamkorlik mintaqa uchun yangi imkoniyatlar ochadi, xalqlar oʻrtasidagi aloqalarni mustahkamlaydi va Markaziy Osiyoni dunyo uchun yanada ochiq va jozibador qiladi", – deb yozilgan.