ASHXOBOD, 21-fevral. /"Dunyo" AA/. Turkmanistonning "ORIENT", "SalamNews" va "Turkmenportal" axborot agentliklari O'zbekiston Prezidenti tomonidan imzolangan "Buyuk turkman shoiri va mutafakkiri Maxtumquli Firog'iy tavalludining 300 yilligini keng nishonlash to'g'risida"gi qaroriga bag'ishlangan maqolalarni tarqatdi, deb xabar bermoqda "Dunyo" AA muxbiri.

Nashrlarda yozilganidek, qarorda turkman xalqining ulug' farzandi Maxtumquli Firog'iy nafaqat turkiy xalqlar, ayni paytda jahon adabiyoti va madaniyati tarixida alohida o'rin egallagan atoqli shoir va mutafakkir ekanligi e'tirof etilgan.

Bu yil nufuzli xalqaro tashkilot – YUNESKO rahnamoligida Maxtumquli Firog'iy tavalludining 300 yillik qutlug' yubiley sanasi dunyo miqyosida keng nishonlanayotgani ham shoir adabiy merosi jahon so'z san'atining bebaho xazinasiga aylanib, insoniyatning ma'naviy olamini yuksaltirishga xizmat qilib kelayotganidan dalolat beradi.

Maqolalarda xabar qilinganidek, qarorda o'zbek xalqining Maxtumquli Firog'iy siymosida qardosh Turkmaniston xalqiga, uning boy tarixi va madaniyati, urf-odat va qadriyatlariga hurmat-ehtiromining yorqin namunasi sifatida hamda shoir tavalludining 300 yilligini munosib nishonlash maqsadida bir qator tadbirlar o'tkazilishi belgilandi.

Hujjatga muvofiq, Maxtumquli Firog'iy tavalludining 300 yilligini yuqori saviyada nishonlash bo'yicha belgilangan chora-tadbirlar dasturida tasdiqlanadi. Maxtumquli Firog'iyning "Tanlangan asarlari" hamda uning hayoti va ijodiy faoliyatiga bag'ishlangan ilmiy maqolalar to'plami va chop etiladi. Shuningdek, davlat buyurtmasi asosida O'zbekiston va Turkmaniston kino ustalari hamkorligida Maxtumquli Firog'iyga bag'ishlangan badiiy film suratga olinadi va  shoir hayoti va ijodiy faoliyati haqida spektakl sahnalashtiriladi. Yosh xonandalar o'rtasida "Maxtumquli she'rlari bilan aytiladigan eng yaxshi qo'shiqlar ijrochisi" respublika tanlovini o'tkaziladi.

"Bundan tashqari, hujjatda, "Maxtumquli ijodining o'zbek adabiyoti va san'atida tutgan o'rni» mavzusida xalqaro ilmiy konferensiya o'tkazish, 2024-yil oktyabr oyida Alisher Navoiy nomidagi O'zbekiston davlat akademik katta teatrida Maxtumquli Firog'iy xotirasiga bag'ishlangan ijodiy kecha o'tkazish va boshqa tadbirlar ko'zda tutilgan", — deb yozgan Turkmaniston ommaviy axborot vositalari OAV.