TOSHKЕNT, 2-iyun. /“Dunyo” AA/. O‘zbekiston tashqi ishlar vaziri Baxtiyor Saidov bugun Ozarbayjon tashqi ishlar vaziri Jeyhun Bayramov bilan telefon orqali muloqot qildi, deb xabar bermoqda “Dunyo” AA muxbiri.

“Ozarbayjon Respublikasi tashqi ishlar vaziri Jeyhun Bayramov janoblari bilan telefon orqali muloqot o‘tkazdik, – deb yozdi O‘zbekiston TIV rahbari o‘zining telegram-kanalida. – O‘zbekiston va Ozarbayjon Yetakchilarining o‘zaro ishonchga asoslangan munosabatlari hamda muntazam muloqotlari tufayli qardosh mamlakatlarimiz o‘rtasida strategik sheriklik va ittifoqchilik munosabatlari yuksak darajaga ko‘tarilganini, siyosiy muloqotlar jadal tus olganini mamnuniyat bilan qayd etdik.

Suhbat davomida ikki va ko‘p tomonlama hamkorlikning dolzarb masalalari yuzasidan fikr almashdik hamda o‘zaro manfaatli sohalarda amaliy hamkorlikni yanada kengaytirishga tayyor ekanimizni tasdiqladik.

Mamlakatlarimiz tashqi ishlar vazirliklari o‘rtasidagi yaqin muloqotni izchil davom ettirishga kelishib oldik”.

“Dunyo” AA arxividan olingan surat