ABU-DABI, 13-oktabr. /"Dunyo" AA/. O'zbekiston diplomatlari Birlashgan Arab Amirliklarining "MBS Global Investments" kompaniyasi ijrochi direktori Ajmal Sharafuddin bilan uchrashuv o'tkazdi, deb xabar qilmoqda "Dunyo" AA muxbiri.

Muloqot avvalida mamlakatimiz elchisi O'zbekistonda amalga oshirilayotgan ijtimoiy-iqtisodiy islohotlar, xorijiy investorlarga yaratilgan sharoitlar, taklif etilayotgan investitsiyaviy loyihalar, xususan, 2023-yil davomida mamlakatimizda ishlab chiqarilgan mahalliy va import qilingan farmatsevtika mahsulotlari to'g'risida batafsil ma'lumot berdi.

O'zbekistonda mavjud investitsiyaviy muhit, investorlar huquqlarini qonunchilik bilan himoya qilish bo'yicha islohotlar hamda 2030 yilga qadar davlat-xususiy sheriklik asosida amalga oshiriladigan loyihalar dasturi to'g'risida taqdimot o'tkazildi.

BAA vakili O'zbekiston farmatsevtika mahsulotlarni "Julphar" kompaniyasi bilan birgalikda yetkazib berishga qiziqish bildirildi. Ajmal Sharafuddinning aytishicha, birinchi bosqichda tibbiyotda kamyob bo'lgan dori vositalari O'zbekiston bozoriga kompaniyaning Hindistondagi ishlab chiqarish majmualaridan yetkazib beriladi. Ikkinchi bosqichda esa ularni O'zbekistonda ishlab chiqarish bo'yicha loyiha amalga oshiriladi.

BAA tomoni, shuningdek, O'zbekiston iqtisodiyotida amalga oshirilayotgan o'zgarishlar va keng ko'lamli islohotlarni to'liq qo'llab-quvvatlagan holda kuzatib borayotganini, mamlakatimizda infratuzilma sohasidagi istiqbolli loyihalarni amalga oshirishga qiziqish mavjudligini ta'kidladi.

"MBS Global Investments" kompaniyasi infratuzilma sohasida Jahon banki bilan amalga oshirilayotgan "Toshkent—Andijon" pullik yo'lini qurish loyihasida ishtirok etishga taklif etildi.

Muzokaralar yakunida yuqorida muhokama qilingan loyihalar hamda O'zbekistonda qabul qilingan xususiylashtirish dasturi bilan batafsil tanishish maqsadida joriy yilning noyabr oyida mazkur kompaniya vakillarining yurtimizga safarini amalga oshirishga kelishildi.