TOSHKENT, 28 sentyabr. /"Dunyo" AA/. 27-28 sentyabr kunlari poytaxtimizda Inson huquqlari bo'yicha O'zbekiston Milliy markazi hamda Axborot va ommaviy kommunikatsiyalar agentligi hamkorligida «Inson huquqlarini himoya qilish sohasidagi davlat siyosati va mazkur sohada xalqaro majburiyatlarning bajarilishi masalalari» mavzusida o'quv kursi o'tkazildi, deb xabar bermoqda "Dunyo" AA muxbiri.

Milliy markaz matbuot xizmati ma'lumotiga ko'ra, mashg'ulotlar davlat tashkilotlarida jamoatchilik bilan aloqalar va inson huquqlari sohasidagi xalqaro hamkorlik uchun mas'ul xodimlar hamda matbuot kotiblari uchun tashkil etildi.

O'quv kursi O'zbekiston Prezidentining 2023 yil 7 fevraldagi qarori bilan tasdiqlangan Inson huquqlari sohasidagi milliy ta'lim dasturi doirasida bo'lib o'tdi. Ushbu tadbir Inson huquqlari umumjahon deklaratsiyasi qabul qilinganining 75 yilligiga bag'ishlandi.

Mashg'ulotlar davomida asosiy e'tibor inson huquqlarini himoya qilish sohasidagi davlat siyosati hamda ushbu sohada xalqaro majburiyatlarning bajarilishiga doir axborotni keng jamoatchilik va xorijiy davlatlarning siyosatini shakllantiruvchi doiralariga yetkazish samaradorligi va sifatini oshirishga qaratildi.

Tadbirda O'zbekiston Oliy Majlisi Qonunchilik palatasi spikerining birinchi o'rinbosari, Inson huquqlari bo'yicha Milliy markaz direktori Akmal Saidov, Axborot va ommaviy kommunikatsiyalar agentligi direktori Asadjon Xodjayev, Oliy Majlis Qonunchilik palatasi qo'mita raisi Dilorom Fayziyeva, Oliy Majlisining Inson huquqlari bo'yicha Vakili (ombudsman) Feruza Eshmatova, shuningdek, markaz xodimlari, ekspertlar va professor-o'qituvchilar ishtirok etdi.

Tinglovchilar uchun «Inson huquqlari sohasida O'zbekiston Respublikasining xalqaro majburiyatlari», «Inson huquqlarini ta'minlashda Parlamentning roli», «Inson huquqlarini ta'minlash va himoya qilishda ommaviy axborot vositalarining roli», «Ayollar huquqlarini himoya qilishning huquqiy asoslari: xalqaro va milliy mexanizmlar», «O'zbekistonda bola hukuqlarini ta'minlash – davlat siyosatining muhim yo'nalishi», «Inson huquqlarini himoya qilishda Ombudsman instituti vazifalari», «Inson huquqlari sohasidagi milliy ta'lim dasturining bajarilishi to'g'risida», «O'zbekistonda nogironlar huquqlarining ta'minlanishi masalalari» kabi mavzularda ma'ruzalar taqdim etildi. Shuningdek, interaktiv mashg'ulotlar o'tkazildi.

Ikki kunlik o'quv kursida turli vazirlik, idora va tashkilotlar, shuningdek, Qoraqalpog'iston Respublikasi, viloyatlar va Toshkent shahar hokimliklarining 79 nafar xodimi qatnashdi.