BOKU, 27-may. /"Dunyo" AA/. Yurtimizning Ozarbayjondagi elchixonasi ko'magida O'zbekiston Millatlararo munosabatlar va xorijdagi vatandoshlar masalalari bo'yicha qo'mitasi raisi Qahramon Sariyevning Ozarbayjondagi vatandoshlar bilan uchrashuvi tashkil etildi, deb xabar qilmoqda "Dunyo" AA muxbiri.

Tadbir davomida Qahramon Sariyev O'zbekistonda turli sohalarda olib borilayotgan keng ko'lamli islohotlar, jumladan, xorijdagi vatandoshlarni himoya qilish va qo'llab-quvvatlash borasida amalga oshirilayotgan sa'y-harakatlar haqida batafsil so'zlab berdi.

Shuningdek, O'zbekiston Prezidenti tashabbusi bilan "Vatandoshlar" jamoat fondi tashkil etilgani, uning maqsad va vazifalari to'g'risida ham ta'kidlandi. Qayd etilganidek, ushbu fond xorijdagi vatandoshlar bilan aloqalarni rivojlantirish, ularning huquq va erkinliklarini ta'minlash, shuningdek, migratsiya siyosatini takomillashtirish, xususan, xorijda vaqtinchalik mehnat faoliyatini amalga oshirayotgan O'zbekiston fuqarolarining qonuniy manfaatlarini himoya qilish yuzasidan chora-tadbirlarni amalga oshiradi.

Uchrashuvda so'zga chiqqan Ozarbayjondagi yurtdoshlarimiz O'zbekistonda turli sohalarda erishilayotgan yutuqlarini yuksak baholadilar. Shuningdek, ular milliy madaniyatimizni targ'ib qilish, O'zbekiston va Ozarbayjon o'rtasidagi do'stona munosabatlarni rivojlantirishga hissa qo'shishga tayyor ekanliklarini bildirdilar.