VARSHAVA, 17-fevral. /“Dunyo” AA/. O‘zbekiston diplomatlari “LOT Polish Airlines” aviakompaniyasi tarmoq byurosi direktori Robert Ludera hamda “Turkish Airlines” kompaniyasining Varshavadagi vakolatxonasi rahbari o‘rinbosari Enser Akarchashma bilan onlayn muloqot o‘tkazdi, deb xabar bermoqda “Dunyo” AA muxbiri.

Muzokaralar chog‘ida fuqarolik aviatsiyasi sohasidagi hamkorlikning bugungi holati va istiqbollari xususida to‘xtalib o‘tildi. Sharqiy Yevropa mamlakatlari, xususan, Polshadan O‘zbekistonga sayyohlar oqimini ko‘paytirish masalalari atroflicha muhokama qilindi.

Suhbat davomida Polsha–Turkiya–O‘zbekiston yo‘nalishi bo‘ylab sayohat qilayotgan Yevropalik sayyohlar oqimini yanada oshirish masalalari bo‘yicha ham fikr almashildi.

Uchrashuvda Polsha va Yevropa Ittifoqi bozorlarida O‘zbekiston brendini targ‘ib qilish, yangi sheriklar topish va ikki tomonlama turizm aloqalarini yanada mustahkamlash lozimligi taʼkidlandi. So‘nggi paytda Polshada turizm bozori yillik o‘sish surʼatlarini namoyon qilmoqda, bu esa O‘zbekiston uchun yangi maqsadli auditoriyani jalb qilish imkoniyatini kengaytiradi.

Qayd etildiki, Polsha turizm bozorining yillik o‘sish surʼatlari O‘zbekiston uchun yangi maqsadli auditoriyani jalb qilish imkoniyatlarini kengaytiradi. Bu ikki mamlakat o‘rtasidagi aviaqatnovlar samaradorligini oshirish va sayyohlik almashinuvini yangi bosqichga olib chiqishga xizmat qiladi.