NOVOSIBIRSK, 3-aprel. /“Dunyo” AA/. O‘zbekiston Bosh konsulxonasi tomonidan Rossiyaning Novosibirsk viloyati muftiysi Abdulhamid Shokirjonovning O‘zbekistonga ilk tashrifi tashkil etildi, deb xabar bermoqda “Dunyo” AA muxbiri.

Delegatsiya 2026-yil 1-5-aprel kunlari mamlakatimizda turli tadbirlarda ishtirok etishi rejalashtirilgan. Mehmonlar dastlab O‘zbekiston musulmonlari idorasi vakillari bilan uchrashuvlar o‘tkazadi. Yurtimizning yetakchi ulamolari bilan fikr almashib, maʼnaviy-maʼrifiy sohada tajriba almashadi.

Uchrashuvlar davomida diniy taʼlim, jamoatchilik va yoshlar bilan ishlash, shuningdek, diniy merosni saqlash va rivojlantirish masalalari muhokama qilinishi kutilmoqda. Bu jarayon ikki tomon uchun ham hamkorlik imkoniyatlarini kengaytirish va yangi loyihalarni amalga oshirish uchun muhim ahamiyatga ega.

Delegatsiya Juma namozini yangi ochilgan Imom Buxoriy yodgorlik majmuasida ado etishi rejalashtirilgan. Bu tadbir nafaqat diniy marosim sifatida, balki tarix va madaniy merosni o‘rganish uchun ham muhim ahamiyat kasb etadi.

Shuningdek, delegatsiya Toshkent, Samarqand va Buxoroning tarixiy qadamjolarini ziyorat qilib, yurtimiz madaniy va maʼnaviy boyligini yaqindan ko‘rish imkoniga ega bo‘ladi.

Tashrif doirasida yangi hamkorlik loyihalarini muhokama qilish, tajriba almashish va ikki tomonlama aloqalarni yanada mustahkamlash maqsadida qator tadbir va uchrashuvlar ham rejalashtirilgan. Bu tashrif, O‘zbekiston va Rossiya, jumladan, Novosibirsk viloyati o‘rtasidagi madaniy-maʼnaviy aloqalarni yanada rivojlantirishga zamin yaratadi.