TOSHKENT, 21-iyun. /"Dunyo" AA/. O'zbekiston tashqi ishlar vaziri Baxtiyor Saidov Istanbul shahrida bo'lib o'tgan Islom hamkorlik tashkiloti (IHT) Tashqi ishlar vazirlari kengashining 51-sessiyasida ishtiroki doirasida Ozarbayjon tashqi ishlar vaziri Jeyhun Bayramov bilan uchrashdi, deb xabar qilmoqda "Dunyo" AA muxbiri.

"Ozarbayjon tashqi ishlar vaziri Jeyhun Bayramov janoblari bilan uchrashishdan mamnunmiz, – deb yozdi O'zbekiston TIV rahbari o'zining telegram-kanalida. – O'zbekiston va Ozarbayjon o'rtasidagi strategik sheriklik va ittifoqchilik munosabatlarini yanada mustahkamlashga qaratilgan ikki tomonlama kun tartibining dolzarb masalalarini muhokama qildik. Savdo, transport-logistika, energetika hamda madaniy-gumanitar sohalardagi hamkorlikni chuqurlashtirishga alohida e'tibor qaratdik.

Ikki mamlakat Rahbarlari o'rtasida oliy darajada erishilgan barcha kelishuvlarning to'liq va o'z vaqtida amalga oshirilishi kun tartibimizdagi ustuvor masaladir".