TOSHKENT, 22-oktyabr. /"Dunyo" AA/. O'zbekiston tashqi ishlar vaziri Baxtiyor Saidov kecha Lyuksemburg Bosh vaziri o'rinbosari, tashqi ishlar va savdo hamda hamkorlik vaziri Ksavye Bettel bilan uchrashdi, deb xabar qilmoqda "Dunyo" AA muxbiri.

"Lyuksemburg Bosh vazir o'rinbosari, tashqi ishlar va savdo hamda hamkorlik vaziri Ksavye Bettel janoblariga samimiy va iliq qabul uchun minnatdorlik bildiramiz, – deb yozdi O'zbekiston TIV rahbari o'zining telegram-kanalida. – Bugun shahar va uning boy merosi bilan yaqindan tanishdik. Shuningdek, O'zbekiston va Lyuksemburg o'rtasidagi sheriklikni yanada chuqurlashtirish, mavjud imkoniyatlardan samarali foydalanish va o'zaro manfaatli hamkorlikni istiqbolli yo'nalishlarda kengaytirish masalalarida samarali fikr almashdik.

O'zaro muloqotni mustahkamlash va uzoq muddatli hamkorlikni rivojlantirishga bo'lgan umumiy intilishlarimiz ikki mamlakatning barqaror taraqqiyoti va farovonligiga xizmat qiladi".