МОСКВА, 26 февраль. /“Дунё” АА/. Ўзбекистоннинг Москвадаги элчихонасида Наманган вилоятининг ишлаб чиқариш ва ҳунармандчилик салоҳиятини намойиш этувчи showroom (кўргазма зали) очилди, деб хабар қилмоқда “Дунё” АА мухбири.

2026 йил январь ойидан бошлаб ушбу кўргазма залида вилоятнинг экспорт, инвестиция ва туризм салоҳияти кенг намойиш этилмоқда. Ушбу showroom экспозицияси Наманган вилоятининг экспорт ва халқаро кооперацияга йўналтирилган етакчи корхоналари маҳсулотлари асосида шакллантирилган.

Хусусан, “Mustang Textile”, “Fazman Textile”, “Samo Textile”, “Ideal” каби етакчи корхоналарда тайёрланган маҳсулотлари намойиш этилмоқда. Тақдим этилаётган замонавий эркаклар классик костюмлари юқори сифат ва халқаро стандартларга мувофиқлиги билан кўпчиликда қизиқиш уйғотмоқда.

“Art Soft Holding” ва “NT Holding” корхоналари меҳмонхона ва корпоратив сектор учун тўқимачилик маҳсулотлари ишлаб чиқаришга ихтисослашган. “Chust Textile” ва “Stark Cotton” корхонаси эса енгил саноат ва тўқимачилик хомашёсини қайта ишлаш сегментида минтақанинг рақобатбардошлигини кўрсатиб, трикотаж маҳсулотлари йўналишини ривожлантирмоқда.

Кўргазма залининг алоҳида бўлими Наманган вилоятининг декоратив-амалий санъати ва халқ ҳунармандчилиги маҳсулотларига ажратилган. Бу ерда меҳмонлар Ўзбекистоннинг маданий-тарихий меросини акс эттирувчи анъанавий супалар, кулолчилик, бадиий ёғоч ўймакорлиги ва бошқа қўл меҳнати буюмларини кўриши мумкин.

Кўргазма залининг фаолият юритиши Наманганда ишлаб чиқарилаётган маҳсулотларни чет элда кенг тарғиб этиш ҳамда янги хорижий мижозлар топишда муҳим аҳамият касб этаяпти. Шу билан бирга, Ўзбекистон ва Россия компаниялари ўртасида тўғридан-тўғри ҳамкорлик ўрнатиш, барқарор кооперация алоқаларини кенгайтиришга ёрдам бермоқда.