ТОШКЕНТ, 15 сентябрь. /"Дунё" АА/. Мўғулистон пойтахти Улан-Батор шаҳрида "Mining Week & MinePro – 2025" тўртинчи халқаро кончилик кўргазмаси бўлиб ўтди, деб хабар қиляпти "Дунё" АА мухбири.

"Uzbek Overseas Geology Company" маълумотига кўра, ушбу нуфузли кўргазма кончилик соҳаси бўйича минтақадаги энг йирик тадбирлардан бири сифатида эътироф этилади ва у кон саноатининг бугунги ютуқлари ҳамда истиқболдаги имкониятларини намойиш этишга хизмат қилади.

Мазкур кўргазмада илк бор Ўзбекистон расмий делегацияси кенг кўламда иштирок этди. Жумладан, Тоғ-кон саноати вазирлиги, "Navoiyuran" давлат корхонаси, "Uzbek Overseas Geology Company" хорижий геология компанияси, "Навоий" КМК, "Олмалиқ" КМК, "Ўзбекистон металлургия заводи" ҳамда Ўзбекистон Технологик металлар комбинати ўз стендлари билан қатнашди. Миллий стендларда мамлакатимизнинг бой табиий ресурслари, илғор геология-қидирув ишлари, кончиликдаги замонавий технологиялар ва ишлаб чиқариш салоҳиятини кенг жамоатчиликка намойиш этди.

Кўргазма доирасида Ўзбекистон ва хорижий компаниялар вакиллари ўртасида учрашувлар ўтказди ва ҳамкорликнинг истиқболли йўналишлари муҳокама қилинди.

"Mining Week & MinePro – 2025" кўргазмасида 14 давлатдан 300 га яқин компаниялар иштирок этди. Унинг дастуридан халқаро конференциялар, панель муҳокамалар, инновацион тақдимотлар ва кооперация учрашувлари ўрин олган. Муҳокамаларда кончилик саноатида юқори самарадорликка эришиш, экологик барқарорликни таъминлаш ҳамда инвестиция муҳитини яхшилаш масалалари хусусида фикр алмашинилди.

Ўзбекистоннинг ушбу кўргазмада ишитироки, юртимиз кончилик ва металлургия салоҳиятини кенг тарғиб қилиш, хорижий инвесторлар ва етакчи компаниялар билан узоқ муддатли ҳамкорлик алоқаларини йўлга қўйиш, шунингдек, соҳада замонавий ва инновацион ёндашувларни жорий этишда муҳим платформа бўлиб хизмат қилди.