ТОШКЕНТ, 13 март. /"Дунё" АА/. Ташқи ишлар вазири Бахтиёр Саидов бошчилигидаги Ўзбекистон делегацияси Кобул шаҳрига ташрифи давомида кеча Афғонистон муваққат ҳукуматининг бир қанча мансабдор шахслари билан учрашув ва музокаралар ўтказди, деб хабар қилмоқда "Дунё" АА мухбири.

"Кобулга ташрифимиз чоғида Афғонистон муваққат ҳукуматининг бир қанча мансабдор шахслари – Бош вазир в.б. Мулла Муҳаммад Ҳасан Охунд Жаноби Олийлари, Бош вазир ўринбосари в.б. Мавлавий Абдул Салом Ҳанафий Жаноби Олийлари, Бош вазир ўринбосари в.б. Мулла Абдул Ғани Бародар Жаноби Олийлари, ташқи ишлар вазирлиги в.б. Мавлавий Амир Хон Муттақий Жаноби Олийлари, ички ишлар вазири в.б. Халифа Сирожиддин Ҳаққоний Жаноби Олийлари, савдо ва саноат вазири в.б. Нуриддин Азизий Жаноби Олийлари билан учрашувлар ўтказдик, — деб ёзди Ўзбекистон ТИВ раҳбари ўзининг telegram каналида. — Музокаралар чоғида ўзаро ҳамкорликнинг кенг кўламли масалаларини муҳокама қилдик. Иқтисодий алоқаларни мустаҳкамлаш, ишбилармон доиралар ўртасидаги муносабатларни яхшилаш учун энг қулай шарт-шароитларни яратишга алоҳида эътибор қаратдик. Бизни бой ва муштарак тарихимиз, умумий анъаналаримиз ва келажагимиз бирлаштиради. Биргаликда амалга оширишимиз мумкин бўлган кўплаб имкониятлар мавжуд".

Эслатиб ўтамиз, Ўзбекистон ташқи ишлар вазири Бахтиёр Саидов 10 март куни ташриф билан Доха шаҳрига борди ҳамда Қатар Бош вазири ва ташқи ишлар вазири Муҳаммад бин Абдулраҳмон бин Жасим Ол Соний билан учрашди.

Анвар Илёсов олган сурат («Дунё» АА)