ТОКИО, 6 октябрь. /"Дунё" АА/. Япониянинг машҳур "Nikkei Asia" журнали ва электрон нашрида Япониянинг "Sojitz" компанияси Ўзбекистонда янги аэропорт қуриш лойиҳасига сармоя киритишига бағишланган мақола эълон қилинди, деб хабар қилмоқда "Дунё" АА мухбири.

Унда қайд этилишича, "Sojitz" компанияси бу йил Ўзбекистон пойтахтида Тошкент шаҳрида янги халқаро аэропорт қуришни бошлайди. Мазкур лойиҳа компаниянинг 1 миллиард долларлик инфратузилма инвестициялари доирасида амалга оширилади.

Тошкентдаги аэропорт Саудия Арабистонининг "Vision Invest" компанияси билан давлат-хусусий шериклик асосида қурилади. "Sojitz" лойиҳага бир неча ўн миллиард йен, яъни юзлаб миллион доллар инвестиция киритишни режалаштирмоқда. Шу кунга қадар компания Япониянинг Кумамото ва Окинава префектураларида ҳамда Палау оролларидаги халқаро аэропортлар лойиҳаларида иштирок этган.

"Ўзбекистон янги аэропорт лойиҳасини 2025 йил август ойида тасдиқлади. Лойиҳага кўра, 2028 йилда очилиши режалаштирилган бу аэропорт йилига 20 миллион йўловчини қабул қилиши ва соатига 40дан ортиқ учиш-қўниш ҳаракатларини амалга ошириши мумкин. Бу уни Марказий Осиёнинг энг йирик аэропортига айлантиради", – деб ёзилган мақолада.

"Sojitz" шунингдек, Ўзбекистонда бошқа инфратузилма лойиҳаларида ҳам иштирок этишни режалаштирмоқда. Улар Самарқандда "Ronesans International" турк компанияси билан ҳамкорликда 800 ўринли йирик касалхона, 1 гигаватт қувватга эга шамол электр станцияси ва 1,6 ГВт қувватга эга иссиқлик электростанциясини қуришни режалаштирмоқда.

 Нашрда маълум қилинганидек, Ўзбекистон 37 миллион аҳолиси билан минтақада энг катта давлат саналади ва ички умумий маҳсулотнинг йиллик ўсиши 6 фоиздан юқори. Чет эл инвестициялари учун солиқ имтиёзлари ва бошқа рағбатлар мавжуд, корпоратив солиқ ставкаси эса 15 фоиз.

"2024 йил октябрь ҳолатига кўра, Ўзбекистонда 54 та япониялик компания фаолият юритади, бу 2019 йил кўрсаткичидан икки баробар кўп. "Sojitz" компанияси июнь ойида Тошкентда илк бор расмий офисини очди", – дейилган нашрда.

Нашрда маълум қилинишича, Япония бошқа компаниялари ҳам Ўзбекистонда инфратузилма соҳасида фаолият юритмоқда. "Масалан, "Toyota Tsusho" ўз бўлинмаси "Eurus Energy Holdings" орқали 500 мегаваттлик шамол электр станцияси лойиҳаси учун майдонни ўрганмоқда ва "NEC" билан ҳамкорликда дата марказлари қуриш бўйича шартнома имзолади. "Marubeni" БАА компанияси билан ҳамкорликда чиқинди сувларни тозалаш заводини қурмоқда", – дейилган манбада.

"Nikkei Asia" нашрида эълон қилинган мақолада "Ўзбекистон Япония Иқтисодиёт, cавдо ва cаноат вазирлиги билан минерал ресурслар, айниқса стратегик аҳамиятга эга бўлган минералларни қазиб олиш ҳамкорлигини кенгайтириш бўйича музокара олиб бормоқда", – дея Ўзбекистон инвестициялар, саноат ва савдо вазири Лазиз Кудратов фикрларидан иқтибос келтирилган.