ПEКИН, 26 октябрь. /«Дунё» АА/. Хитой эксперт-таҳлил доиралари ва оммавий ахборот воситалари вакиллари «Дунё» АА учун интервьюсида Президент Шавкат Мирзиёевнинг Брюсселга буюрган ташрифи якунлари ва Ўзбекистон билан Европа Иттифоқи ўртасида Кенгайтирилган шериклик ва ҳамкорлик тўғрисидаги битим имзоланишининг аҳамияти ҳақидаги фикрларини билдирди.

Лю Сюй, Хитой халқ университети ҳузуридаги Россия, Шарқий Европа ва Марказий Осиё маркази директорининг ўринбосари:

– Мен Ўзбекистон Президентининг Европа Иттифоқи пойтахтига биринчи ва, очиғини айтганда, узоқ кутилган ташрифини катта қизиқиш билан кузатдим.

Биламизки, Ўзбекистон етакчиси кўплаб Европа раҳбарлари билан узоқ вақтдан бери жуда дўстона муносабатларга эга, бу эса ушбу ташрифнинг муҳим муваффақиятини таъминлади.

Томонлар ушбу тадбирга пухта тайёргарлик кўрди. Апрель ойининг бошида Самарқандда биринчи «Марказий Осиё – ЕИ» саммити бўлиб ўтди, бу минтақалар ўртасидаги ушбу форматни фаоллаштириш учун платформага айланди.

Албатта, Европа сиёсатчилари билан музокаралардан ташқари, энг кутилган воқеа Европа Иттифоқи ва Ўзбекистон ўртасида Кенгайтирилган шериклик ва ҳамкорлик тўғрисидаги битимнинг имзоланиши бўлади. Ҳужжатнинг аҳамияти жуда юқори. Бу муносабатларда кенгроқ ҳамкорлик доирасини – савдо, инвестиция, рақамлаштириш, яшил иқтисодиёт ва бошқа соҳаларни қамраб олувчи янги босқичдир.

Биз дўст Ўзбекистонга халқаро майдонда янада катта муваффақиятлар тилаймиз.

Ван Минмей, «Псеарчер» журнали муҳаррири:

– Президент Шавкат Мирзиёевнинг Бельгияга буюрган ташрифи Ўзбекистон ва ЕИ ўртасидаги муносабатларнинг сифат жиҳатидан янги даражасини белгилади.

Бу кўп жиҳатдан сўнгги йилларда Ўзбекистон Европа билан муносабатларнинг янги конфигурациясини жадал равишда қураётгани билан боғлиқ. Ўзбекистоннинг Европа мамлакатлари билан алоқалари кенгайиб бормоқда ва уларнинг ҳамкорлик соҳалари диверсификация қилинмоқда. Бу мамлакатда амалга оширилаётган ислоҳотларнинг аниқ муваффақияти туфайли иқтисодиётнинг барча соҳаларида янги имкониятлар очмоқда ва инвестиция муҳитини яхшиламоқда.

Буни Брюсселда бўлиб ўтган давра суҳбати натижалари тасдиқлади. Унда Европа молия институтлари ва йирик компаниялари раҳбарлари Ўзбекистон Президентига мамлакат бозоридаги иштирокини кенгайтиришга ва янги қўшма ташаббусларда иштирок этишга тайёр эканликларини айтишди. Умуман олганда, Ўзбекистон ҳозирда Европа Иттифоқи билан иқтисодий ҳамкорлигини янада чуқурлаштиришдан манфаатдор. Ўзбекистон иқтисодиёти модернизация қилиш ва рақамли ўзгартиришда давом этар экан, Европа инвестициялари ва технологиялари, шунингдек, таълим, ўқитиш ва тадқиқот соҳасидаги тажриба бу жараёнларда муҳим роль ўйнаши мумкин.

Шу сабабли, Ўзбекистоннинг ЕИ ва Бельгия билан иқтисодий ҳамкорлигини янада чуқурлаштириш, шубҳасиз, ўзаро манфаатли жараён бўлиб, бу Президент Шавкат Мирзиёевнинг ташрифининг муваффақиятидан дарак беради.