ТОКИО, 24 апрель. /"Дунё" АА/. Япониянинг оммабоп "Mainichi Broadcasting System, Inc." (MBS) телеканалида Осака шаҳрида ўтказилаётган "Экспо-2025" Бутунжаҳон кўргазмаси майдонида қурилган Ўзбекистон миллий павильонига бағишлаган махсус кўрсатув намойиш этилди, деб хабар қилмоқда "Дунё" АА мухбири.

"Ўзбекистон павильони: келажак ва анъаналар уйғунлиги"  номли теледастур мамлакатимиз элчихонаси кўмагида тайёрлади. Унда Ўзбекистон павильонининг ўзига хослиги ва замонавий ғоялари ҳақида батафсил маълумот берилган. Ўзбекистон тарихи, маданияти ва келажакка оид режалари ҳақидаги муҳим маълумотлар томошабинлар эътиборига тақдим қилинган.

Шунингдек, кўрсатувда Ўзбекистон миллий павильони "Экспо-2025" кўргазмасининг энг диққатга сазовор ва инновацион иншоотларидан бири сифатида эътироф этилган.

"Павильон Японияда ўсадиган 286 та суги дарахтидан бунёд этилган,  махсус бинонинг баландлиги 8 метр. Ташқи деворлар Аважида лойдан тайёрланган экологик плиткалар билан безатилган. Лойиҳанинг асосий ғояси – "Билимлар боғи", яъни ёш авлоднинг таълим олиш ва тараққиётга  интилишини ифода этади", – дея таъкидлаган дастур муаллифи.

Қайд этилишича, павильон интерьеридаги 360 градусли экран ва проекцион мэппинг технологияси ёрдамида Ўзбекистоннинг бой маданияти ва табиий гўзалликлари виртуал равишда намоён этилади. Шунингдек, Японияда илк бор жорий этилган кўтарилувчи саҳна ёрдамида ташриф буюрувчилар 10 метр баландликка кўтарилиб, Ўзбекистон келажагини "вақт ичидаги саёҳат" шаклида кузатиш имконига эга бўладилар.

Ўзбекистоннинг тарихий шаҳарлари, айниқса Самарқанд ва Регистон майдони, меъморий услублари ва кўк мозаикалари орқали жаҳон эътиборини тортади.

Павильон ушбу анъанавий элементларни замонавий услубда қайта намоён этиб, меҳмонларга Ислом маданияти ва миллий нақшлар ҳақида аниқ тасаввурни шакллантиради.

Шунингдек, дастур давомида "MBS" ижодий гуруҳининг 2024 йил 22–27 январь кунлари Ўзбекистонга амалга оширган сафари чоғида суратга олинган мамлакатимизнинг туризм салоҳияти ва маданий мероси ҳақидаги лавҳалар ҳам намойиш этилди.

Эслатиб ўтамиз, Япониянинг Осака шаҳрида 13 апрель куни очилган "Экспо-2025" кўргазмаси 13 октябргача давом этади. Бутунжаҳон кўргазмасини ўтказиш бўйича Япония Ассоциацияси маълумотига кўра, 158 мамлакат иштирок этаётган мазкур тадбирга ҳар куни 150 минг келмоқда, 6 ой давомида эса 28,2 миллион меҳмон ташриф буюриши кутилмоқда.