ЛЮБЛЯНА, 3 ноябрь. /“Дунё” АА/. Словения Президентининг халқаро муносабатлар бўйича маслаҳатчиси, Любляна университети профессори Златко Шабич “Дунё” ААга берган интервьюсида АҚШ Давлат котиби Марко Рубионинг 18–20 октябрь кунлари Ўзбекистонга амалга оширган ташрифи ҳақида фикр билдирди.

Профессор Златко Шабич ташриф хусусида тўхталар экан, уни улкан миқёсдаги воқеа сифатида таърифлади. Самарқанддаги бизнес тадбирларида 100 га яқин Америка компаниялари иштирок этганини алоҳида эътироф этди. У бундай кўламни ҳатто Словения каби кичик давлат мисолида ҳам тасаввур қилиш қийинлигини таъкидлади.

Шу билан бирга, Златко Шабич Президент Шавкат Мирзиёевнинг 2025 йил 21–22 май кунлари Словенияга ташрифига Ўзбекистон пухта тайёргарлик кўрганини қайд этиб, бу ҳақда ҳамон ҳамкасблари билан фикр алмашишини таъкидлади.

Олимнинг сўзларига кўра, Словения кичик давлат бўлишига қарамай, Ўзбекистон томони ташрифга тайёргарлик кўришга катта эътибор қаратган. Профессор ижобий таассуротлар қолдирган ушбу жараёнда иштирок этгани ўзи учун шараф эканини алоҳида қайд этди.