ВАРШАВА, 5 декабрь. /«Дунё» АА/. Ўзбекистоннинг Польшадаги элчихонаси томонидан Вистула университетида Бош қомусимиз қабул қилинганининг 31 йиллигига бағишланган давра суҳбати ўтказилди, деб хабар бермоқда «Дунё» АА мухбири.

Учрашувда Польша олий ўқув юртларида таҳсил олаётган ва ушбу мамлакатда вақтинчи меҳнат фаолияти билан шуғулланаётган фаол юртдошларимиз иштирок этишди.

Тадбирда сўзга чиққан дипломатлар, Конституция ҳар бир давлатнинг суверенитети, унинг давлатчилиги ривожи, фуқароларнинг турмуш тарзи, жамиятдаги ўрнини белгилаб бериши ҳамда мустақил, эркин, тинч ва фаровон ҳаётнинг кафолати бўлиб хизмат қилишини таъкидладилар.

Йиғилганларга янгиланган Ўзбекистон Конституциясида мамлакатимиз илк бор ижтимоий, дунёвий, ҳуқуқий давлат, инсон, унинг ҳаёти, эркинлиги, шаъни, қадр-қиммати ва бошқа дахлсиз ҳуқуқлари олий қадрият эканлиги белгилаб берилгани қайд этилди.

Тадбирнинг якуний қисми очиқ мулоқот тарзида кечди, унда ватандошлар Польшада бўлишлари давомида юзага келган муаммолар ҳақидаги саволларига элчихона ходимларидан атрофлича жавоб олдилар.

Шунингдек, ватандошларга элчихона фаолияти, телеграм мессенжерида янги очилган расмий канал ва бот ҳақида маълумот берилди.

Давра суҳбати якунида Польшада ўзбек талабалари ассоциациясини ташкил этиш ҳамда турли маданий ва спорт тадбирларини ҳамкорликда ўтказиш тўғрисида келишиб олинди.