НУКУС, 1 май. /"Дунё" АА/. Ўзбекистоннинг Гуанчжоу шаҳридаги Бош консулхонаси кўмагида 27-30 апрель кунлари Хитойнинг Гуандун провинцияси ишбилармон доиралари вакилларининг Қорақалпоғистонга бизнес-миссияси ташкил этилди.

Сафар Ўзбекистон–Хитой ўртасида ҳудудлараро ҳамкорлик алоқаларини кенгайтириш, мамлакатимизга хорижий инвестицияларни ва илғор технологияларини жалб этиш мақсадида уюштирилди.

Хитойнинг "Guangzhou Fangchuan Lubricants Technology", "Dongguan Yaosheng", "Guangdong Weilian Wire and Cable", "Zhujinag Cable", "Opit Intellegent Equipment", "Ouyate Electric Products", "Dongguan Electronic Technology", "Hengyu Wisdom Technology" ва бошқа компаниялари раҳбарлари Қорақалпоғистонда ҳудудий ҳокимликлар ва бизнес доиралари вакиллари билан самарали учрашувлар ўтказдилар.

Шунингдек, Хитой вакиллари жойлардаги мавжуд хом-ашё базаси ва инфратузилмавий имкониятларни кўздан кечирди.

Томонлар электротехника саноати, "ақлли" қишлоқ хўжалиги, текстиль, энергетика ва бошқа соҳаларда қўшма лойиҳаларини ишлаб чиқиш ва биргаликда амалга ошириш юзасидан дастлабки келишувларга эришдилар.