ВАРШАВА, 17 май. /"Дунё" АА/. Ўзбекистон дипломатлари Польшанинг "Norco" компаниясида бўлиб, корхона раҳбари Рафал Килиан билан учрашув ўтказдилар, деб хабар қилмоқда "Дунё" АА мухбири.

Томонлар Ўзбекистонда мебель ишлаб чиқариш ва интерьер ечимларини амалга ошириш борасида юқори салоҳият мавжудлигини қайд этиб, қўшма лойиҳаларни амалга ошириш, технология ва тажриба алмашиш, шунингдек, маҳаллийлаштириш жараёнларини йўлга қўйиш масалаларини муҳокама қилдилар.

Польша томони эътиборига Ўзбекистоннинг инвестициявий салоҳияти ва "Термиз халқаро савдо маркази" эркин савдо зонаси фаолияти тўғрисидаги видеолавҳалар намойиш этилди.

Музокаралар якунида "Norco" компанияси вакилларининг 2025 йил 10-12 июнь кунлари бўлиб ўтадиган IV Тошкент халқаро инвестиция форумида иштирок этиши бўйича келишувга эришилди.

Мазкур форумда иштирок этиш компанияга Ўзбекистон бозоридаги инвестиция муҳитини яқиндан ўрганиш, бизнес ҳамкорлар билан тўғридан-тўғри мулоқот ўрнатиш ва янги лойиҳаларни муҳокама қилиш имкониятини тақдим этади.

Дипломатлар учун корхона бўйлаб экскурсия уюштирилди. Унда мебель маҳсулотларини лойиҳалаш, тайёрлаш ва ўрнатиш жараёнлари билан танишилди.

"Norco" компанияси Польша бозорида офислар, савдо мажмуалари, меҳмонхоналар, ресторанлар ва турли жамоат бинолари учун функционал ва замонавий интерьер ечимларини ишлаб чиқиш ва ўрнатиш бўйича етакчи компаниялардан бири ҳисобланади. Компания фаолиятида инновацион ёндашувлар, юқори сифат стандартлари ва экологик тозаликка алоҳида эътибор қаратилади.