ЎШ, 4 июль. /“Дунё” АА/. Мамлакатимиз Бош консулхонаси дипломатлари Қирғизистоннинг йирик импортчи корхоналаридан бири — “Ali Group Company” МЧЖ бош директори Баҳодир Аҳмаджонов ва менежери Алишер Аҳмаджонов билан учрашув ўтказди, деб хабар бермоқда “Дунё” АА мухбири.

Музокараларда қайд этилишича, биргина жорий йилнинг май ойида Ўзбекистондан Қирғизистонга умумий қиймати 235 минг АҚШ долларига тенг бўлган қандолат маҳсулотлари экспорти таъминланди. Ҳозирги вақтда “Ali Group Company” компаниясининг Ўзбекистон билан йиллик ўртача савдо айланмаси 2 миллион долларни ташкил этмоқда. Бундан ташқари, мазкур компания юртимизда энергетика соҳасида ҳам фаол иш олиб бормоқда. Хусусан, шу кунларда компания томонидан Наманган вилоятида қуёш панелларини ўрнатиш ва “яшил” электр энергияси ишлаб чиқариш бўйича истиқболли лойиҳа ҳаётга татбиқ этилмоқда.

Мулоқот давомида қирғизистонлик тадбиркорларга Ўзбекистонда маҳаллий ва хорижлик ишлаб чиқарувчиларга яратилган қулай шарт-шароитлар, ўз маҳсулотини хорижга экспорт қилувчи корхоналар учун давлат томонидан берилаётган кенг кўламли имтиёз ва преференциялар борасида батафсил маълумотлар тақдим этилди.

Учрашувда  Қирғизистон томони Наманганнинг “Panda Sanoat Savdo” МЧЖ ва Тошкент шаҳрининг “Confe” МЧЖ маҳсулотларини Қирғизистон бозорида кенг реклама қилиш ҳамда уларнинг тизимли экспортини йўлга қўйиш мақсадида ушбу корхоналарнинг расмий дистрибьютори бўлиш истагини билдирди.

Шунингдек, бугунги кунда Қирғизистонда кенг миқёсда олиб борилаётган қурилиш ишлари муносабати билан металл арматурага бўлган эҳтиёж юқори эканлиги қайд этилди.

Музокаралар якунида ўзбек маҳсулотларининг Қирғизистон бозоридаги улушини янада ошириш мақсадида яқин истиқболда “Ali Group Company” МЧЖ делегациясининг Ўзбекистонга ишчи ташрифини ташкил этиш ҳамда “Ўзметкомбинат” АЖ, “Panda Sanoat Savdo” ва “Confe” корхоналари раҳбарияти билан тўғридан-тўғри бизнес-мулоқотлар ўтказишга келишиб олинди.