ОҚТОВ, 29 сентябрь. /"Дунё" АА/. Қозоғистоннинг Оқтов шаҳрида мезбонлик қилган ТУРКСОЙ III Халқаро театр фестивали якунланди, деб хабар қилмоқда "Дунё" АА мухбири.

Шу йилнинг 21-26 сентябрь саналарида бўлиб ўтган фестивалда Ўзбекистон, Қозоғистон, Туркия, Озарбайжон, Қирғизистон, Туркманистон ва Венгрия театр жамоалари қатнашди.

Фестивалнинг ёпилиш маросимида ТУРКСОЙ бош котиби Султон Раев сўзга чиқиб, ушбу тадбир туркий дунё маданиятини тарғиб этишдаги муҳим ўрнини таъкидлади. 

Туркий халқларнинг маданий ҳамкорлигини намоён этувчи фестиваль саҳнасида Муқимий номидаги Ўзбекистон давлат академик мусиқали театри томонидан "Қобил ила Ҳобил" спектаклини намойиш этди.  Ўзбекистон театр санъати вакиллари ижросидаги спектакль ҳакамлар ва томошабинлар томонидан юксак баҳоланди.

Якунда Муқимий номидаги Ўзбекистон давлат академик мусиқали театри томонидан намойиш этилган "Қобил ила Ҳобил" спектакли "Энг яхши мусиқали драма" номинациясида ғолиб деб топилди ва "Спектаклнинг мусиқий ечими учун" мукофотига сазовор бўлди.